السلام عليكم ورحمة الله وبركاته ...
تحيه طيبه...
بالامس تلقينا خبر وفاة الشاعر الكبير الشعبي
عبد الحسين الحلفي (سياب الشعر الشعبي)
انا لله وانا اليه راجعون
لهذا نتقدم بأحر التعازي
لكل شعرائنا الافاضل
ونسأل الله تعالى
ان يتغمد روحه بواسع رحمته
وداعآ ياسياب البصره
من روائع الحلفي :
يعجبني الجرح لو لاكه شمات
يضم روحه بحيث يبين إلتم
و تعجبني السيوف بجف السباع
يحمرهه الخجل لو ما لكت دم
إذا إنته شفت لاتكول ماشوف
تحجي العين إذا لسانك تلعثم
شوف الفلح من تموت الورود
بغير ورود هيه تروح تشتم
بس شوف الورد لو مات فلاح
من تشمه تلكه بعطه مأتم
شوف أصعب وجه تقراه العيون
لكن بالقلب بس الله يعلم
قلبي كزاز بس تسحكه خسران
إذا هوه إنكسر إنته التصب دم
إلحسب عقله يحب صدكني يرتاح
و الحسب قلبه يحب صدكني يندم
لذلك آني أحب آدم أبو الكل
بس ما أحب أبو التفاح آدم
حسب عقلك ياصاحب شوف كلشي
و أضربلك مثل عن كلشي و شلون
أكو يحجون من الصبح للليل
و حرام إن جان تفهم شنهو يحجون
و أكو ساكت و حلكه مخيط خياط
و حجيه شكد حلو بنظرات العيون
من أبزك بالحجي لا تزعل أرجوك
إسمعني و كول شكرا كول ممنون
الأبره من تبز الثوب يا صاح
قصدهه تخيط بشك اليشكون
حسب عقلك يا صاحب شوف كلشي
و أضربلك مثل عن كلشي و شلون
وداع اللي تكرهه يريح البال
و وداع اللي تحبهم يعمي العيون
الماي شكد حلو بحلك العطاشه
بس شلون نقمه إعله اليغركون
تطلع الروح أكو شغلات مرات
بس مرات هيه تردلك الروح
أذيه الباب من ينفتح للريح
بس شلون لو بالسجن مفتوح
إبن آدم يضرب اللوح إبسامير
لكن من يموت يشابكه اللوح
كلش مو حلو قباض الأرواح
و حلو كون بعدوك يقبض الروح
أكو صوته قوي و ما تسمعه الناس
و أكو يكلب الدنيه و صوته مبحوح
أكو إيده طويله و كلشي ما لاح
و أبو فاضل بلا جف كلشي يلوح
أكو كلشي ما يملك عاش مرتاح
و أكو يملك الدنيه و عاش مسكين
أكو ما يباوسونك بس يحبوك
و أكو رب المباوس بس شياطين
أكو يعوفك سنين و جنهه ساعات
و أكو يعوفك دقايق جنهن سنين
و أكو بالكبر بس مو موته عاشو
و أكو مو بالكبر بس همه ميتين
أكو جفه إنكطع بس موش عباس
و أكو يذبحه الشمر بس موش الحسين
