ومضات مختارة لشعراء العراق

تحياتي اخوتي واخواتي قراءت هذه الومضات باحدى المنتديات واعجبني الموضوع فحبيت ان
ان انقلها لكم واتمنى ان تنال اعجابكم

العش مو حطب خل يفهم الحطاب
العش بيت شرعي وساكناته اطيور
العصافير اعتراض الهن على الحطاب
جاب اعشوشهن ونطاهه للتنور

الشاعر عماد المطاريحي

موت من العطش بس لاتطر بستان
لان تصفن عليك اشكد نواعير
يوسف من جماله ابير ذبــــــــــــــوه
اشعجب ليهسه اخوتك مالكو بير؟

الشاعر:علاء آل ياسين

يالطعمك عسل ماترحم العطشــان
ولوكطرة نده اشوي خاف من ربك
نصبك بستكان الجاي جاي اغروب
من كثرة حلاتك جاينه ايشربك

للشاعر عدي فريد

حاجز لا تخلي الباب فد يوم
من عين البشر لا تنحسد خاف
يبو وجه اليشع ياباب اليفيد
سور الصين لو خليته تنشاف

للشاعر حامد الشمري

انت تدري عيوني لمن تشتهيك
تنطي كومة عيون بس اشوفك
لو جنت انت هبل ما هدموك
وجذب ما جانت قريش تعوفك
وجان ليهسة العرب متمسكة بيك
اجيب قربان وتجيك اطوفك

للشاعر ميثم فالح

جرب ابجيني دمعة واهجرني
وارحل وطول سنيني بغيابك
ومن ترد تلكاني اخضر
باقي جن توك هملتة
وجرب اعصرني عصر اطلعلك انتة !

للشاعر ميثم فالح

اكو دمعة انعمت طاحت
وهم مثلهة اكو عين
والفرق بين الثنين
هاي طاحت بالملاهي وهاي طاحت عالحسين

للمتألق البصري عبد الحسين الحلفي

ولكم مني احلى التحايا

عزيزتي فاتن
ذوقك يجبر كل متذوق للشعر
ان يعجبه تحياتي لك
عزيزتي

تسلميلي غاليتي فاتن على هذا الذوق في الاختيار الجميل....تحياتي لكِ ياوردة.

تحياتي لك يالغاليه
فتونه اختيار وذوق قمه في الروعه
ممايدل على انك صاحبة ذوق
لانضير له تحياتي
لك يالغاليه

الله عاشت ايدك وشكرا لامانتك الادبيه

تحياتي لك ياغالي وشكرا لردك الجميل يااخي حسن ابوحيدر

شكرا لمرورك يابطاط مع تحياتي

هلا وغلا ياتاج الراس الشيخ ابو حيدر منور ولك مني ارقى تحيه

شكرا لمرورك اختي الغاليه ميران مع مودتي