ياغنوة عشَك حافظها جوه الروح
ياسيف وجرح بضلوعي من أيحد!!
يا أجمل حلم تاه واجاني أبليل
حسبالي الصبح الكَاه من اكَعد!!
تعرف بيهّ شاعر وانتفض بالليل
وتعرف بالشعر هداته من أيهد!
وتعرف بالعقل ما يرضى يالتقسيم!
وإذا مرة انقسم..يعني الجنون أيرد!
مرات اعتنيلك وانسه روحي وياك..
ومرة الكَاها روحي وياك ضد..الضد!
حمامة بيت انته واحنه ربيناك!
ومن ريشك كبر..من عدنه كَمت أتصد؟!
يمعود تعال ولا تروح أبعيد..
بلابل بيتنة بس بسمك أتغرد..
طلع منيّ جنوني وكَمت اسولف بيك
مثل سكران روحي وكَامت أتعربد!!
مجنون اعترفلك..بس اكو مقياس؟؟
حبل امواصلك..رخيتة..وانته أتشد!
يروح الروح انته..ويانبض شريان
عداد الكَلب بسمك تراه أيعد!!
اسولف وية ضلي..لأن شفتك بي !
وانته لاتجيني..لوعليّ تنشد؟؟
كَلي شلون كَلي؟؟ كَلي..كَلي اشلون؟؟
تبقه انته الغني!! وانيّ الفقير أيكَد؟؟
وتبقه انته الأمير!! وانيّ خادم دوم!!
وتبقه انته السياسي!! وانيّ.ند.الند ؟؟
تدري النار بيهّ واحترَك بسكوت..
يالمايك ضحل...كَلي أشوكت تركد؟؟
***********
للشاعر الكبير
جلال البطاط
