خل نرد زغار
يخايب مرظتني خل نرد زغار
ونلعب بالحديقه نخيط ونخربط
وخلنه نروح نلعب عل دجاجات
ونذبلهن خبز بالماي يم البط
ونعبرعل سطوح لبيت ابوياسين
ونبوك الكَواني وحنطه ألها نحط
وخل نلعب لعب مايخطر علَ البال
وخل نلعب دعابل نشمر ونلكَط
تذب دعبلتك انته وتوكَف علشيش
وزطن انه وانته انوب هم ازط
وخل نكبرشويه بعمرسبع سنين
ونروح المدارس وانه اشيل اجنط
وتبدي المشكله وكَلبي يتعلكَ بيك
وحس بهل مصيبه شلون متورط
وحلفنك وخطن خطة العباس
وشوفنك بثوبك تمسح عل الخط
نذل حسيت بيك ومارتريدتكَول
وجي طبعك افاعي وسمك ينكَط
تذكرمن ردت امشي اسولف بيك
وكَتلك بعدروحي انسولف ونزمط
أول لدغه بيه بصدري من حطيت
واول وشم بيه بنابك انت اتحط
ونكبر والسنين تمر عليه طوال
وماكوجلمه حلوه البيك لوتربط
حبيت العذول وكَمت تمشي وياه
ومشابكَ ادين وتمشي يم الشط
لا لونك تغير لا ثنيت العين
لأن حيه صفيت ولونك مركَط
تواكحني بقباحه تكَلي مااهواك
ولاجن بوستك ليهسه بي تكَمط
وذا ناسي المشابكَ هم اذكرك بيه
بس قلمي رفض مايقبل ينقط
بقلمي الشيخ
ابوحيدر الشويلي
