مچتول بسمارك
من حسنك لگيت الروح تحچي اهموم
گلي بياذنب من نزلت الدمعة
جسيت الگلب والگلب مامجيوس
كومة اسنين ساكت محد يسمعة
خليني اعلة صبري راهم آنة اعليه
وسفة اتغَرّبينة وما بعد جمعة
هيجت المعاتب والحچي المضموم
ومكابر دليلي وصدك ايگطعة
صفطت السوالف چلمة چلمة وياك
والشوغات حلفن سري اطلعة
مدري شبدلاك وصابر آنة اعليك
وذنوبك چثيرة وچتلي امشرعة
يلحسنك نهار وشايخ اعلة الليل
وطبعي شما اغيرة مچلب ابطبعة
خصرك ياترف سبحان من سواه
اوجر حيل بية وزيد الجرعة
مچتول بسمارك والگلب يهواك
رمشك بالحشا يالساحر مودعة
صديت الاجاني منك بيمناي
غافلني دليلي ومرك اتجرعة
من شچيت گلبي بفالة ما وجيت
وصوابك غميج ولا دوة ينفعة
تحملت الوجع اوصار بية اصار
ردتك تتنخي وصياحي اتسمعة
حسن الشيخ ناصر
