اخذني يمك بعد ماظل كل عذر لاتعتذر
ليل عمري وعمرك مخلص بعد مابي صبر
خل نلم احلامنه ونحفظ صورهن كبل لاياخذهن بدربه الفجر
وخل نلم الباقيات اسنيني وسنينك
ونسويهن عمر .. وهن ميكفن عمر
ونبدي من جده وجديد بواهس سنين الزغر .. ولو وازانا الكبر
خلي تمشي ايامنه بخطوة العاقل من عثر مره ورجع يمشي حذر
خل نعيش الحب صدفة
خل نضم ارواحنه ابيناتنا اويه اسرارنه ولا نشتهر
وافتخر بيه اويه روحك.. وآنه وي روحي اظل بيك افتخر
حبني .. لتظل تعتذر
خل نسوي العشرة ورقه
ونصنع من الدمعة والضحكه حبر
حتى كل لحظة التمر بالجاي ؟؟ نكتبها شعر
وخل نكول الماضي غلطه .. وذنب يتسجل ذنب من ينذكر
حبني .. لتظل تعتذر
حبني .. واجبرني اعله حبك
الروح ماتعشك لون ماتنجبر
السيف ماينهاب لو ماكو الطبر
حبني.. لتظل تعتذر
واعترف ..راح اعترفلك .. واحنه شو نفس العمر
اثنينه انبعنه بسعر جوه السعر
اثنينه انبكنه حدر شمس الظهر
اثنينه السجين تانتنه نذر
اثنينه اتوهمنه بالحب منتصر
اثنينه انعاني الغذر
واعترف.. راح اعترفلك
كلبي جان شكد جسر .. وآنه جتفت الجسر
وآنه وزيت الحمامه اعله النسر
واسمع السر الخطير...
صنم .. سويته بديه .. وادري ماينفع يضر
وحاطه كبالي وعجيييييبه ..
شوك من عنده انتظر!!!
وانت مثلي بهالعمر
صنم سويته بديك ... شتنتظر؟؟؟
خل نهدم اصنامنه وكافي كفر
وبلكي نهده ونستقر
وبلكت وياك وآنه وياي استمر
وبلكت المامر كبل هسه يمر
وبلكت جناح العشك لبعيييييد ياخذنه ويفر
ونترك الممنوع والميصير..
خل نغط بالماي موصرنه جمر
وبلكي نصحه من السكر
وبلكت المامر كبل هسه يمر
اخذني يمك .. كبل لايخلص صبرنه ويطفى دم وجوهنا وتطلع صفر
اخذني يمك.. كبل لاينحك ذهبها اطباعنا وتطلع صفر
اخذني يمك .. كبل لارمضان يفطر ويفكر العالم مثل جية صفر
مما لامس الوجدان
