لاتعتقد من فرگاك مندوم ... ولا چفي على مودك يوم افركه
وگلبي الماتعرف همومه جواه ...اذا رايد تشوفه گوم حركه
چنت بحار الك يوميه ميناء ....... وآنا عيوني تفتر فرة البنكه
العشگ عندك مواسم بالشته وصيف وأيام الربيع يفوح مسكه
ماتشبع أبد للموت جوعان ...........وحتى بالكبر تحتاج شبكه
مافاد التعب وياك والمعروف ...صرت خسران مثل الماحفظ ملكه
ضميرك مو ذهب تيزاب ..تلعب بيه.. صفر مدغوش لوماصدگت.. حكه
مختوم الذهب والختم حدر النار ...... ولو صار المزامط يفتخر صكه
حسبتك شريچ العمر والروح ..........تاليها الغدر وانفضّت الشركه
حچولي وماسمعت الگالوا عليك......... گالوا ماتحصل وياه بركه
غرگني العشگ حد نزعة الموت ... وانت تشوفني واسمع الضحكه
عرفتك مو وفي ياحيف غدار ...........لو تحلف الي بمليون مكة
ولو تحلف الي بشباچ الحسين الغدر عندك رمح بالگلب چكة
لكني غشيم ومسمعت شور... وچم عاقل نصحني وگال أتركه
ظنيت السنين وياك حلوات...... صرت بيدك مسودن بيده تنكه
ماخذت المثل من گال يفلان .......... ترك المايفيد يفيد تركه
حاولت انتقاء اجمل بيت او بيتين
لكنني لم ارى امامي الا جل الأبيات
مسوّمة بصياغة وحبكة شعرية
ووجدت اقوى المعاني لسمة الغدر
تناولتها قصيدتك الرائعة
ابو حيدر
بالله عليك لاتحرمنا هذا المداد
فمثله لايقاس الا بالتبر
سلمت يداك على هذا النص الرائع
والقريحة الشعرية المميزة
ودمت للفرات نجما متالقا دوما
يتحفنا بأروع المعاني واحلاها
تحياتي وتقديري لك
