_نهر غافي_
مد طولك وي طول الدنيه
تلكه الدنيه تلوك الطولك
وخصرك مثل الركبه مدور
عالي وياجف الينولك
يلضميت اسراري بروحك
سرك بالساني وماكولك
اترف من الدمعه وادري
شمسين انسجنن بحجولك
مرجحني بشوكك ليليه
وخليني باذنك ترجيه
تستاهل اعبرلك دنيه
والكه الدنيه تلوك الطولك
=
يلصوتك ضحكات بروحي
وزندك جن مشدود بعكده
مديت اجفوفي الحيرانه
وخدك ماع وعسل تبده
مرجوحه ارموشك نعسانه
وغافي بحضن خدود الورده
شبسرع الليل المر بينه
جن بايكنه وراد الشرده
=
يمعود خدرانه الشفه
ضاكت برحي وعسل التمره
اجبال الثلج الفوك الدنيه
ماعن من جفين الجمره
من تتمدد نهر وغافي
ومن تتكلب مده وجزره
ولو عينك نكطت بطيبه
تغرك كل الكون بكطره
كل الناس اطوف بعينك
ورموشك شباج بحظره
بس جرح الدنيه ايفركنه
ملظومين بخيط وابره
ياشارع يحمل خطواتك
اثكيل انته وتكسر ظهره
من لميتك بين جروحي
ضكت بحظنك حر البصره
للشاعر حازم جابر
