الام مدرسه والبيبيه كليه

السلام عليكم



هلوhttp://foraten.net?كلمة ممنوعةforate...es/kicking.gif



الام مدرسه والبيبيه كليه

الجده او مثل مانكول بالعراقي بيبي هي تفرح اكثر من الام من يصير عدها احفاد وفرحتها
تكون جبيره ومثل ما قال الشاعر في ديوانه انا وبيبي قال ماتت في محراب عينيك ابتهالاتي
من لي بحذف اسمك الشفاف من لغتي اذن ستمسي بلا بيبي حكاياتي

طبعا الجده او البيبي وجودها بالبيت بركه تلك المراه ذو الشعر الابيض والشيله السوده
والزاويه المعتاده الي تكعد بيها في البيت ومناضرها الطبيه والكيس مالتها الي بيه الادويه
لو مال الضغط لو مال السكر وجيبها من تجي للبيت تشوف احفادها جيبها متروس نساتل
لو حامض حلو اني بيبتي من تجي النه تجيب بس علج ذبحتني بالعلج عاد اني كتلها بيبي
فد يوم حطي ابجيبج جدر دولمه جدر مال برياني تارسته بس علج علج ادري قابل اني حفيدك
بائعة هوى بس اعلج كدام الناس واطك بالعلج اي شويه بحبحيها يابيبي تره المراره صارت تيزاب
من وره العلج

طبعا اوجه تحيه الى كل بيباتكم حبوباتكم تحيه معطره بعطر الورد وانتم احفادها
لازم تاخذون بالكم من بيباتكم ولو البيبيه شويه من تكبر كلش تكوم تشلع القلب خاصه من
يكون سمعها قليل وماتسمع زين اني جانت بيبتي اسمها رنا من صار السمع مالتها مو زين
تسئلني بيش الساعه حبوبه اكلها ب 12 ونص تكلي شنووو اكلها 12 ونص وهي تكلي
شنوووو حبوبه عاد اني اكلها بيبي بكيفج بيش الساعه ترديها جان تكول اريدها بالوحده ونص
عاد اني اكلها بالظبط هسه بالوحده ونص بس فضينه جان تكول لعد صارت الصلاة حبوبه كتلها
اي قبل شويه وذن بلال الحبشي كومي صلي وخطيه تكوم تتوضه وترجع تصلي وقبل ماتصلي
تكلي حبوبه اشو نسيت اني شيعيه لو سنيه اني اكولها شعيه بيبي انتي جان تكول اها همزين كلتلي
حتى ما اتجتف واصلي وره شويه تكلي حبوبه نسيت شنو اسماء الائمه مالتنه ما اذكرني واذكرها
وتكلي جا حبوبه ابو هريره مو وياهم اكلها بكيفج بيبي بس خلصيني فدوه تره خلصت روحي وبعد
مابيه

واذكر بيبتي من جانت بعدها بحيلها من رجعت من الحج وجايبه هدايا كتلها بيبي شوكت اطلعين
الهدايا جان تكلي من يطلعن النسوان جايات يباركون ويطلعن اني ماصبرت رحت على النساوين
كتلهم شوكت اطلعون من عدنه عاد وحده منهم امبينه وكحه كالت ولك ليش تريد نطلع كاعدين
على قلبك كتلها لا والله مو بيبي كالت من يطلعون النسوان انطلع الهدايا وجان تعظ بشفايفها وكالت
ضامتها من نطلع هسه قحط الي يسمعها يكول جايه من فرنسا وجايبه هدايا خاله الهدايا كلها لو
علقجين لو دشداشه بيضه قحط شنو ماشايفن احنا البارحه رجلي ابو قاسم جابلي دشداشه كودري
بهاري صلوخ شحلاته من لبستها طلعت سندرلا السماوه عبالك شكرلمه من شافني ابو قاسم
جاب مرهم مال حروق لانه مشاعره صارت ملتهبه كلش وصار ثور مجنح وصاح بعلو حسه
ياعراق شحد حيلك كوم ياعراق يومك هاليوم شد حيلك كوم هذوله احنا رجال الغيره ياعراق
شد حيلك كوم


تره البيبيه بركه مو مال سباحه لا بركه وخير بالبيت داروهن عفيه
الي مايداري بيبيته وقد اعذر من انذر

اي والله صحيح البيبيه بركه بالبيت بس اني انحرمت منهم من اني صغبره ماتوو وملحكت عليهم اهئ اهئ اهئ

الله يرحم بيبيتج ياحوريه لا تجيبن كلنه على هلطريق

خخخخخخ تحياتي الج يلغاليه على المرور

موضوع جميل
شكرا اخي على الموضوع
تحياتي

شكرأ لمرورك الرائع اخي كريم تسلم

ياغالي لك اجمل تحياتي

تكلي حبوبه اشو نسيت اني شيعيه لو سنيه اني اكولها شعيه بيبي انتي جان تكول اها همزين كلتلي
!!!!!!!!!!!!!!!!!!!!!!!!

ممعقوله ههههههههههههه

شكرا ويسلمووووووووووووو

شكرا والله انه لكلام باحساس ومشاعر

شكرا والله انه لكلام باحساس ومشاعر
الام مدرسة والبييةكلية وكفى

شكرا عزيزي على هذا الموضوع
فعلا موضوع حلو ومقيد ومضحك
تقبل مروري
تحياتي

والي ماعنده بيبيه يدير باله على امه
مشكور على الموضوع الراقي

الام مدرسة ان اعددتها اعددت شعبا طيبا الاعراق ...... اكيد كل كلامك صح ..... زياد 22

شكرأ الكم اخواني الاعزاء على المرور الرائع

ربي يخليكم يااعز الناس

ياعراق شحد حيلك كوم ياعراق يومك هاليوم ههههههههههه

هههههههههههههههههههه
شكرا لك اخي على الموضوع
المميز لك تحياتي وتقديري