عفت كلشي ... وجبت كلشي
ومدري شلون اجيت امشي
. .
اجيتك ردت اكَــلك شـــوف
ردنه انعوف كلشي وماعرفنه نعوف
كون اتشوف حالي اشكَد الك ملهوف؟!!
* * * *
جبت كلشي اليسولف بيك
خيالي وصحوتي وطيوف
جبت دكَات كَلبي الكَطعن كَلبي بجفاك اسيوف
جبت صفنات روحي
السودنت روحي
…
مثل جن بمسيه وعل يتيمه يحوف
كون اتشوف ... بشفافي الحزن ماخله بسمه تعيش
وكلمن كَمت ابوسه ابخده اطبع اوف
كون اتشوف
...
* * * *
ا دموع الجدم مايدري وين يروح
والخطوات عميه
وتايه بلا شـــوف…
كون اتشوف ...
خلصت الوجوه
وشفت كل الناس
كلهه وجوه غربه ولا وجه معروف
وين الكَاك يلموصوف
اليّه وآنه الك موصـوف؟!!
* * * *
يالفركَاك غربة وكلشي
ما مألوف…
انه بلياك مدري اشبيه مابيه ..
زلف وبلايه ترجيه
درب مابيه كل جيه ..
نهر فاض وتبع ميه
رجـع بس مالكَالـه اجروف
كون اتشوف روحي اشخلّه بيهه الخوف
مطلوبة نذر واتخاف ..
ماتوصل حضرتك
من بعيد اطّوف..
* * * *
كون اتشوف روحي اشخلّه بيهه الخوف
مثل دمع العروس…
الجايه اعله اجناب
ويصبّر عليهه
وجابهه الزافوف…
* * * *
وشوف اشخله بيّه الخوف
مثل حلّت مدارس
روحي احسهه اطفال
حلّت واتركتني
..
وباقي بس اصفوف
* * * *
ويا وحشة اصفوفي ومن يجيني الليل
ويالون الوجه
بعدك الضل مخطوف!!
* * * *
وياقسوة اظنوني الماتريد ارتاح
وانه الصاير اسير
وبيدهن مجتوف..
* * * *
كون الكَاك واشكيلك
على جروحي الّلكَيت
الغشمه بيهه اتروف!!
* * * *
وكون الكَاك وابجيلك وسوي خدودي
سبوره ودمعتي احروف
وكون الكَاك واحجيلك
بكتاب السنين انحذف كلشي الجان
بس اسمك لكَيته الباقي ما محذوف
* * * *
واذكرك من مسحت ادموعي
بآخر يوم على خدودي
احس لهسه طبع اجفوف
* * * *
كون اتشوف اعيوني مضيف تصير وكت النوم
وهلبت بالحلم لنك
تجينه اضيوف!!
كون اتشوف حالي
اشكَد الك ملهوف!!
(مماداعب الوجدا )
