احنه اخوان اختنه , وبيهه متنّخين
ودرب عدنه التحدي وما نملّ منه
وملعبنه الشجاعه واحنه معروفين
سحبنه الكاس غصباً عالينازلنه
موصوفين بالعز والكرامه اولاد
على حب العراق الملحه ربتنه
اذا مسنه ظلم نتكاون ويه الكاع
ابطال الملاحم والغــِيـَر عـدنه
ما نقبل نساوم عالوطن والدين
تواريخ الحروب انوسمت بدمنه
قصص عدنه بجنين وعدنه بالجولان
وبحرب الثمان اروع قصص صغنه
حك باطل شما يحجون النه الزود
خضناهه بكرامه وابد ما يوم دنكنه
الاف ومئات وزدنه عالمليون
واشيعني العدد ما زاد ميهمنه
على أعلى القمم وبكل سهل وبهور
وعلى روس الزلم مرفوعه رايتنه
وعهد نبقه نحبك للأبد يعـــراق
وانت الغايه كلهه وحبك بدمنه
بقلم شاكر الهلالي
