اكابر والجروح اهواي
ودوس اعلى الجرح ومشي
وسولف بيه مابيه..
وظم ظنكه بوسط ظنكه
وعلم روحي عالضحكه
وكولن يلله مكظيه..
وظم من شامتي شيبي
ونبت رمحي بكليبي
وكولن حلوه هالدنيه..
واشتل عالجرف اسمي
وظم من الخلك رسمي
واخافن لو دروا بيه..
عهد ثابت كظه بعمري
وخلص بلعمر صبري
لجن حيلي نكت بيه..
واسكت لو حجوا عني
ربعي خيبوا ظني
مني الصوج انه وبيه..
انا العلموه هله اعلى الذل
وبتاريخه شبه لرجالها تكتل
حكم جبري حكموني الحراميه..
انه البيدي ذبحت ابني
جاع وطاح عن متني
وعطش ما عندي اله اميه..
وانه البيدي بعت بنتي
بذهولي وحيرتي وصمتي
ونسيت امي العراقيه..
انه الباكوه ربعه بحجة الخطار
ونه الاضحك اذا بيه توج النار
لان خطاري اخو ليه..
انه بعهد القديم اسكت ولا احجي
ومن بعد السقوط اتعلمت ابجي
لان خوفي كبر بيه..
انه من الجبن صرت انه مو انسان
هتكوا كلشي الي وتحولت حيوان
وصرت احجايه واغنيه..
انه العني قبل كالولي القلعه
ما طفت سنين الغابره الشمعه
عروس انه جنت واجمل ابنيه..
اكيد الماعرفني احتار
انه المحترك نار بنار
وخلوني وحيد اصفك بديه..
انه بغداد يالمحد عرفني
جنت جنه قبل للي وصفني
هسه النار حركت كل كتر بيه..
انا القلعه الشموخ الجنت عز الناس
انه الهيبه الاصل وللعرب رفعة راس
ولا واحد ذكرني صرت منسيه..
عفتوني النذل بارخص ثمن باع
وشروني الي صفو للاجنبي اتباع
وبالخضراء صارت قسمتي الميه...
بحجة برلمان الكاظم اتفجر
وابني الجان عندي عنوة هجر
وصرت سنيه..شيعيه..
خطيه الثوره صارت ليل في ليل
صفت مكبره وتلم بلمجاتيل
لعبوا لعب اصحاب الفيدراليه..
الي يزورني يبجي عليه
يهل ادموع ويكلي خطيه
ولا جني هذيج الكالبه الدنيه...
بقلمي زهير العقابي
