قصيدة كاظم اسماعيل گاطع لابنه المتوفي ( حيدر )

بدى العام الدراسي وبدت الهموم
وبيتي عالمدارس بابه صاير
نسيت وداعتك جيت اشتري هدوم
الك..ومحضر اقلام ودفاتر
مو تسمع قيام وليش متكوم؟
ومر اسمك ولا من كال حاضر
الشمس طلعت علينة مو وكت نوم
وهم عدكم صبح يا اهل المكابر؟.
وهم عدكم ضوة وشباج ونجوم
وهم ينطونكم واجب لباجر؟
الوالد بالوداع يصير مهموم
وآنه اثنينهن والد وشاعر
خيلك طشرتني وجنت ملموم
وصارت طيحتي.. بين الحوافر
اذا عشرين يوم وما شفت نوم
شيضل بالحيل بالعشرة الاواخر؟
فراش الفاتحه لو شفته ملموم
بنص كلوبنه تلكه الجوادر
يمنه المصبغه اودّينه الهدوم
الحزنك مشترينه قماش حاضر
تمنيتك جرح كلساع ملجوم
وتبات الليل بشفاف الخناجر
انا يا بوي من ونيت مالوم
نزل مني دمع يعمي النواظر
خدودي معوده تتندى كل يوم
وتحب الماي خشبات الكناطر
لمت الروح بس شفادني اللوم
شلحّك؟ ويسفينه الموت عابر
المنايا عالسطح وعيونها تحوم
عليك..ونزلتلك نسر كاسر
سترالله نغط بديارنه البوم
اخذ عين الكلاده وراح طاير
ديّني حلاتك حلو الرسوم
بلكي انعشك دنيانه مظاهر
اظل كاظم وصبري وياي مكظوم
لوما هالخشب جوه الاظافر
..اهن كاسين بيهن كاس مسموم
خاف اغلط وبالمسموم اكاسر
بعنه البيت ريت البيت مهجوم
وريت اكثر بعد من هالخساير
تحب انته اللعب والكبر ملموم
شلون تحملت وشلون صابر؟
وليش امن الهوى يابوي محروم؟؟
ونسمات الهوى اطّيب الخاطر
من هو؟الشوفك صورة المعدوم؟
وليش تعلكت يا شاب قاصر
ما ضنيت زرعي يروح فد يوم
وعصافير الحزن تكضي البيادر
من اكتب قصيدة تزيد الهموم
ومن عيني الدمع يملي الدفاتر

تحياتي لك ياميراج
قصيدة اشجت القلب حقيقة وانزلت دمعي
كلمات معجونة بالألم والحسرة ( صعب جدا فقدان الولد )

شكرا لاختيارك وساعد الله قلب كل اب فقد إبنه

اطيب الأمنيات لك بالتوفيق عزيزي

قد ادميت قلوبنا حزنا بهذه القصيده يا ميراج
وجعلت الدموع تنهمر كالمزن
الله ايصبر كل من فقد ولد له
تحياتي

خالتي أم فيصل .... السومري .... أهلا وسهلا ومرحبا بكم نورتو الصفحة بكلامكم الذي يشع طيب ورقة وحنان

ولم احزن على القصيدة مثل حزني على دموعكم الغالية

ميراج قهرتنة والله

واحنة العراقيين تعلمنة على الحزن والفراق

مشكور اخوي العزيز

تحياتي الك

قصيده مؤثره اه والله قلبت المواجع

عمو رنا ..... اخويه أبو علي شرفتونا بجيتكم وهلا بيكم

ااااااااااه قصيده قويه ومثره وردودكم تجي مثل البلسم ع الجرح

على راسي انتو هلا بيكم

محلاج مراج ومحلة انتقائك لهذه القصيدة

ابكيتني والله
اعان الله الشاعر كاظم اسماعيل على بلواه
ذوقك في اختيار القصيده اكثر من رائع لان القصيده الت اخترتها هي نشيد وطني لكل الاباء الذين فقدوا ابنائهم في دولة الاحزان...ورغم تعدد اسباب الموت

وفقك الله ميراج ولك مني الف تحيه
اخوك زهير العقابي