بعد اسبوع
تحچي إبكل بساطة..
إتگلـّي بعد إسبوع ...
يتفرَّق شملنا.. وينتهي الموضوع!!
هيچي إبهل سهولة ..
إتضيع منـّا اسنين..
وتموت المحنـَّة.. وكل گَلب مفجوع..!!
يعني أتصير هاذي؟ ...
اوچنـَّا كل مصباح ...
نتلاگه ابفرحنا .. إونضوي مثل إشموع..!
يا ربَّي دخيلك!!
طوِّل الأيام ....
رجْعِنـَّا الزَّمان الراح منـَّا إرجوع..!
من نگعد سوى ..
اونتناغه مثل إطيور ..
نتتفاهم ابهمسه.. وصوت ما مسموع..!
سكرانين چنـَّا ابخمرة الأحلام..!
مَنـْحس بالوكت.. لا نعطـش إو لـنـجوع..!
نشرب (كابَچينو)..
وگهوه ونصب چاي ...
ونسولف نكات .. إبأدب ما ممنوع
معقوله إنتفارگ ..؟؟
والأسامي إتضيع !!
تصبح ذكريات .. إو بس نكت إدموع..!!
ويهزنا الوكت ...
ريشة ابمهب الريح..!
كل واحد الوحده ..ومن جذر مگطوع..!
صرنا إحروف ....
يلعب بينا ياهو الچّان..
وبجرَّة قلم ..!! فوگ الورق مطبوع..
هاك أخذ إانفكاكك ..
روح وألله وياك!!
أنت إمنين إجيت..؟ المصدرك مرجوع..
ما يدري...
إبكياني انزرع يَمَّه إهناه..!!
وِتـْعَمْـقَت جذوره ..وصار بيه إفروع..
وأوراق إوْ ورود..
وياسيمن وهيل..
جوري وعنبر ومِن كل شكل مزروع..
وفوگ أغصاني بلبل..
كل صباح ألگاه..
ساحرني ابحنانه.. ولحنه المسجوع
راقي ابكبرياءه ..
ومستحاة البيه....!!
بس إبْرقـْـتـه ماكو .. إتگول موطـه إيموع..!
يشرب (كابَچينو) ....
ومن حلاة إشفاه..
يلزگ (كابَچينو) .. ويبقى بيها اسبوع !
مفتون ابدلاله ..
ومثل حور العِين..!
بس أذكـّر إسمه.. العِطر يمّي إيضوع..!
ذكـره بكل سَحَر
وبكل مسا ومصباح....
دوم بدمّي يسري.. وبالگلب مودوع..!
لو تدري إشْأَعاني.. ؟؟
واني وحدي بليل...!!
لو مَر طيفه عيني ... وگام گلبي إيلوع..
هيچي اتريد منـّي..
إبكل بساطة أنساه..؟
ونسى أيَّـامه كلها وگلبي المصدوع..؟؟
هم هذا حـكـم؟؟
وتريدني أقبل بيه..
وآني إشچم حكم منك إلبيه ملسوع..!!
لا..!! لتگلي روح ...
وبيدك أخذ إكتاب...
چنـّي إمن المشاعر والفكر منزوع..
تدريني رقيق...
وگليبي كـلـَّه إحساس...
يتفطـَّر بهمسه .. او مو صخر مصنوع..!!
كِتابك خلـَّه عندك..
آني باقي إهناه..!
ما أرجع بعد.. وعليك أهَيْج إجموع
خَيْسجلوني غايب ....
خلهم يفصلون...
آني إهناه باقي...
الحب عذر مشروع...!!
د.هاشم الفريجي
