اشكد حلو ........اشكد مو حلو

أشگد حلو ..... وأشگد مو حلو ؟.
أشگد حلو من تمشي بالشارع ويجيك طفل ويطلب منك المساعدة ويگلك (عمو الله أيخليك أمي مريضة وأريد أخابر أبوي أبساع بلكي تنطيني موبايلك حته أخابره لأن رصيد ما عدنه) وأشگد مو حلو من تنطيه الموبايل حته أيخابر أبوه وهو أيحول رصيدك من موبايلك الى رقم ثاني ؟؟.

اشگد حلو من تصرف الدولة أفلوس وتشتري أجهزة أنارة تعمل بالطاقة الشمسية للشوارع التعبانة حته نتواصل ويه بقية العالم ونطور أشوية (ولو هي صارت قديــــــــــــــمة) ومن تنصب هاي الأجهزة أشگد مو حلو من تطلع ما تشتغل الأ بالمناسبات لو عاطلة أصلاً عن العمل لو أتقاعدت رغماً عن خشمها ؟؟.

أشگد حلو من تذكر أجدادك وآبائك وتزور مقابرهم وتقرالهم الفاتحة وتوزع ثوابات على أرواحهم ومن تنطي الثوابات لبعض الناس في تلك البقعة حول المقابر أتگله أخذ هذا الثواب يگلك ألمن أقره الفاتحة ؟؟ أتگلله لأمة محمد (صل الله على محمد وآل محمد) أشگد مو حلو من أيگللك لا لشيــعة أمــير المؤمنين ( أبــــــــــــــد ماكو طائفية )؟؟.

أشگد حلو من تزور المريض وتسئله عن أحواله ويلاگيك أبو الاستعلامات وينطيك محاضرة بقوانين ومواعيد الزيارات للمستشفى وتعليمات راحة المريض وأشگد مو حلو من يگللك دير بالك علينا ؟؟.

أشگد حلو من يرفرف العلم العراقي (رمز البلاد) على دوائر الدولة الرسمية ويلعلع بالعلالي وبعد چم يوم أشگد مو حلو من ياكله التراب ومحد أبحاله حته لو كان علم (سفارة لو وزارة)؟؟.

أشگد حلو من يطلع مسئول أنيق ولابس قاط عريق وينطيك تصريح رناني واحد أيگول أبرمضان راح تستلمون (عدس) بالحصة التموينية (حته أتشبعون شوربة عدس أتدفيكم) والثاني أيگول الكهرباء راح تتحسن خلال السنة الي تجي ورة السنتين الجاية وآخر أيگول أتعاقدت الحكومة مع شركات عالمية لبناء مجمعات سكنية للمواطنين وتصريح وتصريح وتصررر.. وأشبع تصاريح كلهن أيخبلن أتخلي المتغرب أيلمم أهدومه وينوي الرجعة للوطن ومن يطلع النهار أشگد مو حلو يذوب كلام الليل المدهون بلزبدة (على گوله المصري).

أشگد حلو المدرس من يخاف على مستوى الطالب ويگله مستواك ضعيف وينراد أتشد حيلك وتقرة والطالب المسكين ياخذ نصيحة المدرس ويشتري عطر محترم وينطيه هدية بسيطة للمدرس أشگد مو حلو من يگلله المدرس (بده مستواك يتحسن) ؟؟.

أشگد حلو من أكتب مشاركة وتردون عليا بجواب وأشگد مو حلو من تشوفون المشاركة وتغلسون ؟؟.

والله يا اخي موظوعك اذا اكلك رائع قليل بحقة

وهذا حالنة احنة ودنعيشة ودنشوفة بارك الله بيك

واني رديت عليك يعني حلو موموحلوووووو

بصراحه يا اخ حسام موضوعك حلو

حلو انك تكتب وتترجم من واقع الحياه

والمو حلو ان يمر عضو وما يكتب كلمة شكرا

شكرا اخى حسام

جميل وحلو ما قرأت لك

لك خالص تحياتى

تسلمون يا احلا اختين في المنتدى
وردة بغداد الحبيبه ونور الشرق

تسلم ايدك يا حسام
بالفعل الموضوع اشكد حلوووو ورائع
تسلم يا خوي

هههههه لا اني مراح اغلس
عاشت ايديك الوقع بعينة وربي
تحياتي
اسيرة الوطن

أشگد حلو من أكتب مشاركة وتردون عليا بجواب وأشگد مو حلو من تشوفون المشاركة وتغلسون ؟؟.
ههههههههههههه حلو وكلش حلو

موضوع مفيد وجديد وفريد
تسلم اخي العزيز على هذا الموضوع وننتظر جديدك القادم ايها المبدع

تحياتي واحترامي

موضوع جدا حلو
والاحلى انه ينقل الواقع المرير الي دنمر بيه
شكرا عزيزي للمجهود الحلو
دمت ودام لنا هذا الجمال الابداعي
لك كل التقدير

شكراااااااااا

موضوع جدا حلوووووووو

تسلم الايادي على روعة

الموضوع

ننتظر جديدك اخي الكريم

تحياتي

تسلم الايادي التي ابدعت في هذا الموضوع


جميل ان نشاهد واقع الحياة مترجم في كلمات طريفه تسعد من يقرأها وتفيده



دوما انشاء الله متميز اخي الكريم


احترامي لك

والله الموضوع كله حلو ويستحق الواحد يرد علي ويشارك بي

ما بي اي شيء مو حلو والاحلى بي هو الواقع الي دا نعيشه

عاشت ايدك والى الامام ونريدك اقواى ونتظر منك المزيد

تحياتي لك