أمثال عراقية قديمة ولكن !!! بمعاني حديثة

أمثال عراقية قديمة ولكن !!! بمعاني حديثة
اتمنى من كل واحد يدخل على الموضوع يختار المثل القريب عليه
او على اوضاع منطقته

تيتي تيتي مثل ما رحتي جيتي / معاناة العراقيين

من تمشي تتعثر بيه .. ومن تريده ما تلكيه / الشرطة

غراب يكول لغراب وجهك اسود / اتهامات بين اعضاء الحكومة

طابوك نام ، شكنك كام / الاساتذة و العلماء ماتو ... و الحرامية صارو فيكه

لا خبر لا جفيه لا حامض حلو / جية بوش و رامسفيلد كلها مفاجئة

يركض و العشا خباز / العراقي الشريف

المنحوس منحوس حتى لو حطوا براسة فانوس / معاناة العراقيين مع الفيز و الاقامات

الچبير چلب .. الصغير چلب ابن چلب / بوش الاب و بوش الابن


بيدر الذهب هم يحتاج بيدر الدخن / احنا اهل النفط ... نستورد مشتقاته ؟؟؟

جيب ليل .. وأخذ عتابه / اذا عندك معتقل اتريد تعرف وين و ليش ؟

حضٌر المعلف .. گبل الزٌمال / المعلف ما حظروه بس جابولنه زمايل

حظي بكل شي اسود بس بالرگي أبيض / عراقي مو بالحكومة

عداوة البزون والجريدي / امريكا صارلها شكد اتدك علينا واكو ناس يكولون تحرير

عباس المستعجل / بصرف الفلوس و الرشاوي

ان اكرمت الكريم ملكته , وان اكرمت اللئيم تمردا / الاردن

عيسى اتچل على موسى وضاعــت الجـاموسـة / الشيعة والسنة يتمالخون و امريكا ماخذه النفط

صيف وشتا . . على فد سطح ؟ / لا كهرباء لا بانزين لا مي صيف وشته


الفكر فوك البعير و عضه الجلب / عراقي راح للصومال ما حصل فيزا

ما لقوا بالورد عيب قالوا خده احمر / الكهرباء تنتل مو زينه عليكم

ابن خالت الخياطة اللي خيطت بدلت العروس / حتى هذا حصل وظيفة من يم المسؤولين

أبن الحلال بذكره / الانفجار

أنطي الخبز لخبازه / اهل النفط صاروا ضباط

إيطلّع من الحافي نعال / ابو البلدية

اسمه بلحصاد ومنجله مكسور / ناس اتداوم بالبيوت ويستلمون رواتب

أحبك وانت لابسني / التبريد

أتعلّم الواوي على أكل الدجاج / شوكت يعوفون الكراسي

أكل ومرعى وقلة صنعه / البرلمان و الوزارات

باب النجار مخلوع / ناس تحجي بالدين و لا دين لهم

تمخض الجبل فولد فارا / صرفوا مليارات و الكهرباء بالقطارة

حجيك مطر صيف ميبلل أليمشون / القمم العربية

درب الجلب علقصاب / الاردن

راح الاكو و الماكو / العراق و ثرواته

راح دمه هدر / الشعب العراقي

رزق الشباب ورا الباب / الاحزاب هيه الابواب لأن ماتشتغل الا بتزكية

روحه بلا رده / انسحاب اي شخص من الحكومة

شوفوني نجوم الضحى / خطط امنية خمس نجوم

اللي يشوف الموت يرضى بالصخونة / شطلعنه لغير بلاد لوما الوضع ؟

زاد الطين بله / كل مسؤول يصرح يزداد الوضع سوء

عامي شامي / رصاصات الجيش و الشرطه

شتحط الها حتى تطيب؟ / الوضعية

شرادين بحلوك واويه / المتاحف العراقية

شعره من جلد خنزير / الحصة التموينية

شعيرك ولا حنطتهم / عدنه شعير و نستورد الحنطه من استراليا (ابعد مكان)
شفت بعيني محد كلي / ابو غريب

الركعه زغيره ، والشك جبير / توحيد صفوف العراقيين

شكينا الدف ، وبطلنا الغنا / بعنا بيوتنا وسافرنه

الشمس ماتتغطى بالغرابيل / يطلعون دعايات (يمضون و نبقى)

شنو هل اللذة من هالفكر / حواجز كونكريتية و فردي وزوجي

شوفته حزن، و فراكه عيد / السيطرات مال علاسه

صار تاليها انكس من اولها / والحمد لله

الصبر مفتاح الفرج / حتى المفتاح مولس


الطباخ ما ياكل من طبخه / طبخولنا حياتنا و ماضاكوها

الطبيعة تغلب التطبع / كركوك عراقية

طرطميس لا جمعه و لا خميس / الجامعه العربية

طماطه، ترهم على كل شي / تغيير التشكيلة الحكومية مجرد مداورة الاسماء

عادت المياه الى مجاريها / و كل المجاري طايفه

علج المخبل ترس حلكه / كل مسؤول شكد حاط حماية

عند البطون تعمى العيون / من يلغفون كلها تغمض

غاب القط العب يا فار / و الله دتلعب الجريدية

فص ملح وذاب / عزة الدوري

فوك حكه دكه / يخطفون و ياخذون الفدية و يكتلون

كل لشه متعلكه من كراعينها / بلكي يسمعون الحكومة

ياكلون تمري و يضربوني بالنوه / الاردن

يشتري من عدّنا ثلح و يبيعلنا مي بارد / كل الدول المجاورة

تالي الليل تسمع حس العياط / الله يدري شظاميلنه بعد
__________________
تحياتي وتقديري
منقول

عاشت ايدج عزيزتي
امثال وتعليقات من الواقع والحال العراقي
وراح نظل نكول ( تفرج ياعراق )
سلمتي على هذا الإختيار
ودام لنا هذا التميز
مع ارق تحياتي

فعلا اختي الغالية

امثال من صميم الواقع العراقي

عاشت ايدج والله

دمتي بكل خير

تحياتي

اقتباس:

---

المشاركة الأصلية كتبت بواسطة ام فيصل

عاشت ايدج عزيزتي
امثال وتعليقات من الواقع والحال العراقي
وراح نظل نكول ( تفرج ياعراق )
سلمتي على هذا الإختيار
ودام لنا هذا التميز
مع ارق تحياتي

---

وما أتي النصر الا من عند الله
والفرج يا اختي العزيزه أتي من الله وليس من البشر
كما ذكره الله في سورة النصر فهذا هو املنا الوحيد من الله
حسب مااستخلصتها من بحوثاتي عن الحروب القادمه
في بلدائننا العربيه والاسلاميه في زمن ظهور المهدي
فهو المنقذ الوحيد الذي سيرسله الله
لانقاذ الاسلام والمظلومين وتحقيق العداله
لفتره من الزمن وبعدها ياتي ظهور ياجوج وماجوج والحديث في هذا الموضوع طويل ومتشعب.

تسلمين عزيزتي ام فيصل على هذا المرور العطر
ويسرني دوماً بتواجدك في صفحتي المتواضعه
دمتِ بحفظ الرحمان

تحياتي وتقديري

اقتباس:

---

المشاركة الأصلية كتبت بواسطة بلسم الروح

فعلا اختي الغالية

امثال من صميم الواقع العراقي

عاشت ايدج والله

دمتي بكل خير

تحياتي

---

تسلمين عزيزتي بلسم الروح على هذا المرور الرائع
لاحرمنا الله من تواجدك في صفحتي المتواضعه
دمتِ بحفظ الرحمان

تحياتي وتقديري