عجب گلبي اليحبك چان
ومكركح چنت بالنص
وچنت عيني الأشوفن بيك
يا وسفه وطفيت الفص
وچنت سچينه أحرزك دوم
بس بليل غفله وردت بيه تگص
وچنت مغزل وأمن بيك صار سنين
ماأدري بغزالك يطلع مخلبص
غشيم وأمنت حسبالي طبعك ذاك
وآنه من المرار البيك أتفرغص
رگطه وأمنت نيبانك بمگفاي
غشيم وأمنت حسبالي ماتگرص
تذبني بچم بليه ووصلتني الموت
وتتركني بوكاحه ومنها تتملص
خلص ماضل صبر حتى اصبر الطاريك
وعمري بكل مراره بعشرتك خلّص
كسر العظم ياخذله شهر ويطيب
كسر الگلب هم يفيد يتجصص
اليشوف الينذبح يتلوه فوگ الگاع
من الوجع يرفس لاتضن يرگص
