قصيدة فقير (لشاعرالحي ناظم الحاشي )

قصيدة فقير (لشاعرالحي ناظم الحاشي )


على اجروحك ... غفيت ابليل الهموم ... وتلگاك الصبح بالهم يوعيك

اذا راد الفرح ... يتسامر وياك ... يلم حزن الوكت ... كلة ويبجيـــك

تعلم بيك وكتك ... يزرع احـــزان ... وگبل وردك يحصدك ما يخليك

عماك وخلة عينك ... متر متشوف ... وتظم روحك ... اذا صاحب يلاگيك

يرد بيك التعب ... وافراشك الگاع ... ويگص بيك ... البرد محد يغطيك

على اجروحك ... مشت كل السجاجين ... تگص منك لحم واعظام ترميك

فقير ودمعتك ... مو مثل الدموع ... ولا من تبجي .... دمعاتك تسليك

الفقر مو عيب ...لكن يشده البال ... ويخلي الناس ... بأسمك ما تسميك

نعم ترتاح ... اذا تاجر وشبعااااااان ... ونعم يكتل... اذا جوعك يوازيك

غناة النفس ... اعظم من غنى المال ... وضل نفســـــــــــــك ابية
وكلشي يرضيــــــــــك

ماكو انسان ... يكتب رزق لأنسان .. اذا رب العرش ما راد ينطيك

ولو دنياك عگرب ... مالهة إعيون ... تكتلك وبذنب غيرك تداعيك

انصحك لا تطخ ... راسك للايام ... ولا ايدك تمدهة إشما قست بيك

ولا إيـــــــــــــدك تمدهة اشمــــــــا قست بيـــــــــك

الله بشار الدعيمي رائعه تلك القصيده عاشت ايدك اخي العزيز للنقل وبارك الله بيك

عاشت ايدك اختيار موفق
ننتظر جديدك

تحياتي

عاشت ايدك عزيزي
قصيدة مؤلمة ورائعة بمعانيها
مبدع دوما ياغيث
شكرا لك ولهذا الإختيار المميز
مع تحياتي لك

عاشت الايادي ع الموضوع الرائع

رائع مانقلت اخي بشار
لاحرمنا الله عطائك
تحياتي

حقيقه انها قصيده رائعه وجميله
تقبل مروري