ويـــــــــــــــــــــن جنتـــــــــــــــــــــي

هاحياتي...... وين صرتي
امبركعه بثوب الحزن ما جنج انتي
انه ما شفت الدمع
باطراف عينج
بس احس فد شي
نزل بلل وجنتي
وكلت انتي
تاكل الحسبات روحج
واحترك كلبي الوفي
ونزلت دمعتي
ودعت كلبي بامل مابين ادينج
تالي لا كلبي الرجعلي
ولا رجعتي
لامست بيج المحنه ودوريتج
واشتهيتج مزنه بايام القحط
بس ما مطرتي
وتيهت اثار جدمي اباب بيتج
ومن لكيتج
عثره بدروب العمى وزادت عثرتي
انه اعرفج من زمان المدرسه
وذيج الصرايف
من جنت بستان
وبكلبي انزرعتي
ذيج اثارج بعدهي اعلى السواجي
وذاك بيت بيوتنه وكتبي ولعبتي
انتظرتج
من زمن مابيه طفوله
جي على الكلشي
بقت تلهب حسرتي
وين جنتي
تاخرت جيتج علي والشيب اخذني
وانه صفنه تروح
وتردني لصفنتي
وين جنتي
شجم قطار
تعدى والمكسور خاطر
خضر بجدمه العشب
وتعدى ساكه
ومافطنتي
صح ابد مايوم شفتج
ولاسمعت اسمج باذاني
ولا الج عنوان يمي ولا عمر
بس الج طيف اليمر
بالليل وبنوم الظهر
خله كل عمري هواجس
تعتريني
وتنشر جروحي
على وجاغ الجمر
وانه كاعد
من زمن ماجنتي طفله
متاني دربج وانتظر
شماتغيب الشمس
يوعدني الغروب
انتظر محبوبتك
باجر تمر


بقلمي
محمد عبود العبودي

الاخ العبودي قصيده تفعيله رائعه عاشت ايدك وبارك الله بيك دوم الابداع يارب

واحترك كلبي الوفي

صح لسانك

تاخرت جيتج علي والشيب اخذني

كلمات غاايه فالرقه والجمل
احسسسنت اخي الكريم
محمد العبودي قصيده مميزه

اقتباس:

---

المشاركة الأصلية كتبت بواسطة سلام الدراجي

الاخ العبودي قصيده تفعيله رائعه عاشت ايدك وبارك الله بيك دوم الابداع يارب

---

مشكور
حبيبي سلام
على مرورك الرائع
تحياتي الك

عاشت ايدك ياورد للقصيده الرائعه

أين كنتِ؟؟؟؟


ولم تسألها؟؟

اولم يكن بكَ حرياً ان تبحث عنها


وتسأل عن احوالها؟؟ظ



ستقول بانك فعلت....


إذن ماذا جنيت من بحثك


سوى ان الشيب والعمر داهمكما


فلات ساعة مندمِ

\
\




الى الشاعر المميز

قصيدة رائعة

ووزنها المنساب اضفى على بديعها وبيانها رونقا خاصا


شكرا للقلم المميز


ننتظر جديدكم