بسمك الله
وفتحت مازاد كلبي
ردت ابيع شماعشت
كل هالسنين
ذكرى عشكي الصار حاجه
(بربع حاجه)
والصور فزعن عليه
وردت اكلك ضيعت صوره قديمه
صوره جنت وياك بيهه
مثل اعلى لكل حنين
ومره وحدي بليل اظلم
ليل كلش
وجهه اسود
شما ردت احجي واكولن عنه ليل
المهم جنت انه وحدي
( انه والله )
وانته جنت الطاري والطلبه الردتهه
ردت اعرفك انته وين
ردت اشوفك
ردتك اكثر
ردتك بنص ساعه عمري
دخيلك الله احسبهه دين
بسمك الله
وطلبتي بجف من محال
جاوبت حسرة سؤالي
مالكينالك قرين
أجل مني الماي ينزف
من فؤادي مدري جبدي مدري عين
بسمك الله
الشوك مايرحم حنين
نحل جمري وماشعل تنور صبري
ودورت كلشي الاعرفه
الشوارع والازقه
او ورقه ورقه
فتشت كل السنين
ومالكيتك مالكيتك
بس لكيت بدربك الجنت انه اعرفه
لوحه راسمهه من اجيلك
لوحه راسمهه اظنك بالندى الفوك الجبين
رابط ذراعي بصليبك
وانته متقمص يهوذا
واهلك الغربان الالتمت عليه
ساعه تاكل
ساعه تترس وجهي طين
ردت اعرف ليش راسمهه اليه
ردت لكن مالكيتك
انفجر كلبي من اجيت ومالكيتك
طحت ياويلاخ
والغربان كلهن
سوون عزوبيه بيه
ومن متت يله عرفت
مو عليك سنين ادور
جنت ادور عالمنيه
