شخبطه بمناسبة يوم النصر العظيم .

اعزائي
لاتنسوا الأحتفال اليوم بذكرى مرور واحد وعشرين عام على انتهاء الحرب العراقيه الفارسيه 8/8/88 .....
ففي مثل هذ اليوم وقبل واحد وعشرين عاماً تتوج نصر العراق بخسارة مليون رجل ومليونين معوق ومليارات الدولارات وثمانيه سنين اهدرت من عمر شبابنا وكهولنا ونساءنا التي ضاعت بلا فائده ترجى منها , الا ارضاء لغرور القائد الضروره وتتويجاً لعبارة بطل الحرب والسلام الذي عاد الى اتفاقية الجزائر التي الغاها هو بنفسه . !
جا ولك عمي عليش ماتت هاي الشبان وتبهذلت النسوان وتيمت الأطفال , جا غير على شط العرب ومايصير نقسمه ويه العجم ... شو وره سنه ورديت ... يالله مايخالف نرجع على الأتفاقيه القديمه وعلى خط التابلاين القديم وجنك يا ابو زيد ماغزيت ... بلوه وبلانا بيها رب العالمين .. لا والله رب العالمين شعليه .. احنا اللي رضينا بشَعلة النار واحنا اللي احتركنا بيهه ,,,, هسا تكولون ... اهوووووووووو . والله اتدور دفاتر عتيكه ... هسا هذا شي راح وصار ماضي .. بس راح اكلكم هذا الماضي هسا احنا جاي نحترك بناره .. لأن النار مابردت ولا خمدت . بس جانت نايمه تحت الرماد .. وبس شويه طار من فوكاها الرماد ردت اشتعلت اوجرت من جديد .. وردوا العجم دخلوا العراق بدون حرب ودبابات ومدافع .. وباعوا واشتروا .. وذبحوا وههجروا .. ودعموا هاي المليشيا وذيج الحركه وشعلوها للظالين
ولو مو بحرب معلنه لكن بحرب خفيه مستوره وملعونه .... وخوفك من عدو متخفي ..
اتصور الحجي معلوم ومعروف قصده .
اليوم سأحتفل وسأبتهل الى الله ان ينهي هذه الحرب الخفيه المستوره والملعونه .
ارجوكم احتفلوا وابتهلوا معي

طركاعه
يشخبط شخابيط ..يرسم عالحيط
8 / 8 / 2009

اذا اكو شئ صار وديصير لحد الان هو بسبب الحروب الذي ادخل العراق فيها لمدة ثلاثون عامااا
دمرت العراق والبنية التحتية
الاف المعوقين
الاف الاسرى
الاف الايتام
الخ........
لماذا من المستفيد
لكن يجب علينا ان ننسى هذه الايام المرة وان لاا نذكر ونتذكر لانهذا هو هدف الحاقدين بان لاا ننسى هذه الايام

تحياتي

عدوك لا يخوفك من تلاكيه لجروحك يكلله استراحي

ولكن خوفك منلي تخاويه ويسلمك كاع لحلوك المساحي

الله يبعد العراق عن الحروب العلنية والمخفية ان شاء الله
وكافي الي تحمله هالوطن والشعب المظلوم الي رجع قرون للوراء من وره الحروب والعقوبات

خلينه نتامل خير
والي راح راح والله يرحم كل شهداء العراق بكل الحروب الي خاضها القائد الضرورة بلا مبرر

والعراق الجديد ان عاجلا ام ىجلا -- راح يكون يقظ اكثر لأي حرب مخفية بجهود ابناءه الشجعان

ومحروس الوطن بعون الله

مع تحياتي لك عزيزي

السلام عليكم

والله كلاك صحيح وخليتنا نذكر ماسي هي من صلب حياتنا وهي سبب الي احنا هسا بي
يا الله لا تعيد علينا مثل هيجي ايام وصدكوني رغم الي احنا بي ترى ممتاز لان ما اتصور شاف العراق مثله من قبل التاريخ ولحد ما قبل سقوط الصنم
عاشت ايدك على السرد الحلو
ننتظر منك المزيد

مع التقدير

السلام عليكم
شكراً لكل الاخوان اللذين علقوا على الموضوع ..
لكن عمي يا اهل الفرات .. يا أدراه . يامشرفين . شنو السالفه ... شو كل مواضيع القسم السياسي منقوله .؟! وبعدين هذا الموضوع شنو علاقته بقسم اخبار العراق ..
اذا هذا مو سياسي ... جا بروح ابوكم ياموضوع يعتبر سياسي .؟
تحياتي للجميع