الحـــــــــــــــــب
حبٍ يشيّب صاحبه ما بَعَدْ شاب وحبٍ يشيب وصاحبه في شبابه
وحبٍ يغيب وصاحبه ما بَعَدْ غاب وحبٍ يدوم وصاحبه في غيابه
وحب يذوّب خافقٍ ما بعد ذاب وحبٍ يداوي صاحبه من عذابه
وحبٍ يتوّب خافقٍ ما بَعَدْ تاب وحبٍ يزيدك رغبةٍ في الكتابة
وحبٍ حياته كلّها لوم وِعْتاب وحبٍ حقيقي ما يضرّك عتابه
وحبٍ بلا معنى وحبٍ بلا أسباب يبدأ غريب وينتهي في غرابه
وحبٍ ضعيفٍ مثل حبرٍ على كْتاب تمحيه دمعه في ثواني كآبه
وحبٍ قويٍ مثل قصرٍ له أبواب لو هبّ عاتيْ الريح ما اهتز بابه
وحبٍ بداية رحلته نظرة إعجاب وأخر مطافه مثل يومٍ بدا به
وحبٍ يعيش بداخل قْلوب الأحباب وحبٍ يشيع وكل حَيٍ درى به
وحبٍ مقامه في ضلوع الصَدِر طاب وحبٍ يعدّي مثل مرّ السحابة
وحبٍ على قبره نعق بوم وغْراب وحبٍ تغنّى به لحون الربابة
وحبٍ بمقدارٍ وحبٍ بلا حْساب وحبٍ بمعروفٍ وحبٍ نهابه
وحبٍ يعيش أهله وسط داره أغراب ويموت قهر ويندفن في ترابه
وحبٍ غدا سرّه سوالف للأجناب وحبٍ يموت وصاحبه ما حكي به
وحبٍ يشيب وصاحبه ما بَعَدْ شاب وحبٍ يشيب صاحبه في شبابه
