اجيتك والگلب شايل چثيره

اجيتك والگلب شايل چثيره اذنوب
ابحضرة شوفتك ما تغفر اذنوبه



تيهت العشگ لاچن لگيته وياك
محفوره اعله گلبك حرثة ادروبه



ظامي ابوسط حبك ماتروي اشفاي
يالحلگك شهد وتگطر احبوبه



اعيونك دلّه بيضه وگهوتك نظرات
وبفنجان عيني اصبحت مصبوبه



حلو وكله ايتراهش چنّه نجم الليل
گلي اشلون اميّز وجهه من ثوبه



الك ملعب حياتي انفتح حد الشوف
خل حضنك يسجل بالحضن طوبه



هنياله الگعد يمه وحضن ملگاه
وشم منّه عطر وي نسمة اعذوبه



بزر النستله اوكلش رقيق النوب
وناعم فرد مره ابحچيه واسلوبه



من يطلع ..السوگ ايقبل ابرجليه
وعين الناس كلها ابشوفه مصلوبه



وأگبال الشمس لا تطلع اترجاك
هيه الشمس ترحم زبدة الروبه ..!!!



من گد ما ترف ما نشب يمه النار
انخاف اعليه مثل احميمة الذوبه



يا وجه الگمر نايم ابشعر الليل
ويا صورة جمال بغير چرچوبه



رب اللي اخلقك .. من طين هم سواك ؟؟
لو من طين چان اتبيّن اعيوبه



بس ثامن جنانه ونزلت اعله الگاع
واذا سبعه العجايب ثامن اعجوبه



واذا گلنه ملاك بهاي متخلفين
هم شايف ملاك ابشفّته اجناحه



سيگانك قلم من يكتب اعله الگاع
والسنة البشر لأثاره مساحه



واشگد تعب شافت من وراه الناس
بس لو شافهم عدهم صدگ راحه



وبساحة سعد لو مرها مر الطيف
تخجل من يمرها وتعرگ الساحه



بستان الجمال او ورد تنفح بيه
هِلك من شم عبيره ومات فلاحه



شوصفك بالشعر ما يرهم التعبير
صدرك قفل بيت وچفي مفتاحه



تفاح اعلى صدرك شال حِسن البيك
چا ربك عليمن خلق تفاحه .؟

وأگبال الشمس لا تطلع اترجاك
هيه الشمس ترحم زبدة الروبه ..!!!



من گد ما ترف ما نشب يمه النار
انخاف اعليه مثل احميمة الذوبه

لوحة غزلية رائعة المعنى
صح لسانك عزيزي وعاشت ايدك على هذه القصيدة الغزلية

دام لنا هذا العطاء
مع تحياتي لك

يابه والله قصيده رائعه بروعتك عاشت اناملك الذهبيه التي رسمت تلك الصوره الشعريه
ابو حسين تحيه الك خاصه من قلبي المفعم بالحب لهذه القصيده ولك طبعا والسلام

اقتباس:

---

المشاركة الأصلية كتبت بواسطة علي عباس العبادي

تفاح اعلى صدرك شال حِسن البيك
چا ربك عليمن خلق تفاحه .؟

---

مديت جفي أعللصدر شفت البريم أبعثكه
بس وحده منه ضكت اوماضاك أبدن خلكه
أوخلك الله من يمه زعل شاله الحماس أوطكه

سلمت ودمت اخي الغالي للقصيده الرائعه
دمت بالف ود

علي عباس العبادي




اشكرك ومن الاعماق على نقل احدى قصائدي هنا


الا وهي قصيدة (( بزر النستله ))

ولي الشرف حين اجد اخواني من يتناقلون قصائدي

في اغلب المنتديات


لكن...


للأمانة الأدبية ارجو وضع اسم كاتب القصيدة تحتها


اخيك



الشاعر

foraten.net/?foraten.net/?foraten.net/?foraten.net/? الصالحي

الله روعه هذا الابداع سلمت الايادي
لاحرمنا هذه النفس دام
التالق

شكرا ابن عمي عالنقل

تحياتي لك وللمبدع الصالحي 0