اسكر من اذكرك.... للشاعر صهيب السامر
اسكر من اذكرك....
--------------------------------------------------------------------------------
اسكر من اذكرك من يمر طرواك
واحس كلبي ثمل وبكلبه الف حسره
يتمشه اعله كيفه بجسمي ميت شوك
لأن بكل شبر من جسمي الك ذكره
واحس حته برياتي اتدور بين ادماي
وتسأل كلبي (ها ما مر ابد عطره؟ )
واشم عطاب فاح بحبي من كل صوب
واحس النار كلهه بروحي منتشره
مثل طبع الشجر شلتك غصن عالراس
وغشيم اني شكثر لمن صرت شجره
كطعوك انت مني وصرت يدة فاس
وكمت تكسر ضلوعي ودمي تهدره
اشبهك بالصنم مايسوه من ينباع
وبالغش صار (اله) وصعدو سعره
جنت مثل البحر صعدت حسنك غيم
شما تعله ترد كطره بأثر كطره
متعلم صرت عالجرح من سنين
واذا مامر مطر ماتشتكي الصحره
بجيتك من بعت ما أنكر الدمعات
ونسيتك من طحت وي طيحت العبره
صدك مو ضعف دمعاتي من تسيل
عله خدود الجبل تدحرج الصخره
شفت مايك ركد جيتك بواهس ريح
وبما يشتهي شراعك صرت الك مجره
ومن ضكني الوكت كمت اشهك اني تراب
هجمت انت علي برياحك الصفره
صوتك ماتغير بعده نفس الصوت
ولو صار اختلاف شويه بالنبره
وكلبك ماتغيير بعده نفس اللون
اسود ماكدر يكتم ابد سره
وعينك هي عينك بيهه غدرك ذاك
وموهبتك بعدهه تخون بالفطره
بعد كلبي يحبك ماكدر ينساك
ومن شباج ضلعي سوه الك حضره
اكول الكلبي مايرجع نساك وراح
يكلي (انت شعليك اني ابقه انتضره)
انته وكلبي ماحبكم بعد للموت
والي يبيع برخص عشرتنه ماخسره
ضل كلش بعيد بداعتي اترجاك
لاتوصل واجرحك اني هالمره
البركان هاديء ولو دمه يفور
واحذرك ابعد احسن لو طفح شره
تحيااااااااااااااااااااااااااااتي
