قصيدة على لسان ام الشاعر المرحوم رحيم المالكى **))

مو ميت عدل واكبالي اشوفك دوم
واتامل رحيم لغيبتك رجعه
ماصدك غفل يوليدي عني تروح
مستعجل تريد فراكنة بسرعه
كدامي القلم كل ساعة اشمن بيه
بلكي عللقلم نيشان من صبعه
وشكد ذكريات مخلي علاوراق
وحجايات حلوة ابالي متجمعه
نقره بدفترك حد ماتطيح عيون
والبوم الصور نشتاق ونطلعه
عيني عللدرب من ربعك يردون
اكولن بلكي اشوفن جاي وي ربعه
ويطول انتظاري او وكفتي عللباب
عين اتاني تبقه وعين بالدمعة
راح التعب يمه وذاك سهرالليل
لاجني صدك ربيت وأمرضعه
لاجني ابمهد هزيت الولي عليك
يبني ولمن تمرض قلبي اتصدعه
طكتني المصايب واوجرت وياي
متعنية وعلي بيبانهه مشرعه
يومية انلجم يومية عندي مصاب
وانه عللمصايب مالي كل جرعه
شريد انسه ييمه منيلي النسيان
هو الجرف ينسه الماي ويودعه
يوليدي العراقية تسولف بيك
لمن تذكر اسمك كَلبي اتكطعه
تبقه عيوني تربي مكابله الشاشات
بلكت صورتك لو صوتك انسمعه
ظلمة ليل صارت دنيتي بلياك
يلحارك حياتك للوطن شمعه
انته وكل شهيد الطاح وفه الكاع
ياسيف العراق او مهرته ودرعه
اقنع روحي يمكن لو كلت انساك
بس كَلبيي الدفنته وياك شيقنعه

منقول :66 (46)::66 (6)::66 (46):

لاخت بلسم الروح رائعه هذه القصيده عاشت ايدك على النقل والله يرحم الشاعر الرائع رحيم المالكي

تبقى الهواجس شعر وتبقى انته الها اوزان
ويبقى رحيم الفخر وللعز يظل عنوان

مع تحيتي ابو سجاد العتابي امريكا

كذب من كال راح انساك وانسة اشعارك الحلوة

انته وكل شهيد الطاح وفه الكاع
ياسيف العراق او مهرته ودرعه
اقنع روحي يمكن لو كلت انساك
بس كَلبيي الدفنته وياك شيقنعه

صح السان والدة الشاعر المرحوم المالكي

والله قصيدة تالم

حسبي الله ونعم الوكيل

الله عليك اختي والله قد ادميتي قلوبنا
وجعلت الدموع تنهمر
فقد عشنا مع مشاعر هذه الأم التي فقدة اعز ما تملك
تحياتي لك وللشاعر الذي كتب هذه القصيده