من كام يوم قاعد في مكان ما لا بيه ولا عليه وفي ايدي حتتين شغل باشطبهم لقيت واحد من اصحابي داخل عليه وبينهج وبيتلفت حواليه وبيقولي : خد البتاعة دي وخبيها بسرعة
قلت له : حشييييييش .. يخرب بيتك .. انت عايز تشبهني ؟
قال : حشيش ايه يا عم .. دي فلاشه والله العظيم فلاشه ( دي منبا يا معنمي منبا )
قلت : يبقى حشيشه وبتستهبل وعامله نفسها فلاشه
قال : لأ والله دي فلاشة اغاني شعبية .... خبيها بسرعة قبل ما حد يشوفها
قلت : ليه هما بيقفشوا اللي بيسمع شعبولا اليومين دول ؟
قال : شعبولا ... شعبولا مين يا عم ؟ ليك حق .. ما انت مش آب تو ديت ... انت لازم تبقى أب تو ديت يا معلم
قلت : ازاي يعني ؟ يعني احقن شفايفي سيليكون واحلق حواجبي عشان ابقى ابو توديت ؟
قال : لأ مش قصدي ... شعبولا وسعد الصغنن من الجيل القديم ... وفي ثيرد جينيريشن دلوقت يا ريس .... طب سمعت عن صياح الباسوسي وماندو السوري وعلي وزه ومنار محمود ؟
قلت : طبعاً ... يوم الجمعة اللي فاتت قريت صحفة الحوادث بتاعت الاهرام فلقيت العيال دي ممسوكة ضمن تشكيل عصابي لسرقة حبال الغسيل ,,, صح ؟
قال : يا عم بأتكلم جد والله .... دول مطربين يابني والله مطربين
قلت : بأمارة ايه ؟ لا سمعنا عنهم في نشرة الاخبار ولا طبق اليوم ... يعني في مطرب اسمه وزه والتاني البسبوسي والكلام ده ؟
قال لي : مش عايز لوكلوك كتير .... اضرب الفلاشه وتعالى ناقشني فنياً بعد كده ويا تفحمني يا افحمك ..
قلت : فعلاً هو الافحام والفحم والمعسل هو الجو الصحي اللي لازم نناقش فيه اغاني الناس دي
بيني وبينكم عُمري ما سمعت اغاني هابطة الا مجبراً – غصم واقتدار .. غصب واقتدار يعني – في الميكروباصات او التكاسي .. فقلت يا واد جرب هي موته ولا اكتر ..
وقد كان ايها السادة ... انا شربت عشيش يا سعاد .. قصدي سمعت اغاني هابطة يا سعاد ..
اخدت الفلاشا وحطيتها في كاسيت العربية .. وياريتني ما فعلت ... وين هنادي يا اماي ... لأول اعرف معنى جريمة " التحرش الفني "
تخيلوا .. ان في كائنات اخرى معانا عالكوكب بالمنظر ده ؟
اصوات أعوذ بالله ... لدرجة انهم خلوني اراجع حسابات نفسي واقول لها : انت عملت في نفسك كده ليه يا سين سين ؟ وليه ضيعت من عمرك سنين ؟ وما بقتش زي الناس التانيين ؟ وليه فشلت وكملت تعليمك وما اتجهتش لمجال الفنانين ؟
يعني صوتي بالنسبة لهم كروان صداح .. وبلبل نواح .. ومع توفير جو فني كويس لي .. يعني حمام متبلط سيراميك .. ودش ميه ساقعه ... وصابونه بريحه ... ممكن تاخدوا مني احلى فن واعبي شريط يكسر الدنيا
ماشي .. ممكن اتغاضى عن اصواتهم .. انما يبقى صوت وصورة وكلمات ؟ يخرب بيت كده
المهم ضربت حوالي 30 اغنية ... في السريع كده وانا رايح مشوار بعيد شويه ...
مافيش حاجه علقت معايا غير كام اغنية استغربت منهم والله !!!!!!!!!!!
اولاً : الست الطيبة اللي بهدلوها على كبر دي .. ام كلثوم ... يا نهار مش فايت ... ييجي 3 او 4 اغاني من بتوعها بالالحان .. ومشلفطين اللي جابوها ... وعاملين زي اللي جاب لوحه لبيكاسو وراح حاططها في الحمام ومعلق عليها الفوط
لقيت عنوان اغنية اسمها " سترانا " .. مش عارف ليه افتكرت انها بتُعبر عن اغنية هندية !!! آه والله ... اتاريها اغنية " هذه ليلتي وحُلم حياتي ... وكمل بقى لحد .. وبيوت كانت قفاراً .. سترانا .. يعني it’ll see us وصاحبنا كان ماشي كويس وصوته زي الموتور المفوت لكن اللحن حلو وعارفه ... صاحبنا جه لحد كلمة سترانا وفضل يعيد ويزيد فيها ييجي 50 مره برزع وخبط ورقص وحاجه اخر شخلعه .... وعوافي يا ست ....
ثانياً : سمعت اغنية وماقدرتش اكملها وركنت على جنب الطريق من كتر الضحك .... الاغنية اسمها " ذئاب الجبل " قلت حلو ... الدكتور جمال سلامه راجل فاهم موسيقى ، اتاريها لا تمُت بصلة الى اي ديب من ديابة الجبل .. وبدأت ازاي بقى الاغنية " سمعني ذائب الجبل ... يا عم ديب ورا ديب .... سمعني وانسى الهم يا عم .. يا عم فرجه قريب ... وديب ورا ديب حبيبي ما جاني ديب حبيبي .... الخ .. قلب سميرة سعيد ويم ورا يوم حبيبي ماجاني يوم "
انا اتلخبطت وحسيت اني محاط بمجموعة من الذئاب البشرية ,,, وفعلاً ما كنتش عارف اعد الديابة وراه ..
ثالثاً : ده بقى اللي صعب عليه ... والله يا جماعة .. مُترب .. قصدي مطرب تلاتة ارباع الحروف عنده ضايعه وحروف السين والصاد والزين والذال واشياء اخرى بينطقهم شين واضحه .... آه والله .. واطلقوا لخيالكم العنان بقى .. يعني لما تشمع قصدي تسمع " شلام للعريش والعروشة والمعاشيم " اقعد انت فك الطلاسم وهات القاموس وفسر يا معلم
طب ليه يابني ؟ وايه اللي جبرك على كده ؟
قصدي ما تقعد في بيتكم ؟ او تروح لدكتور فوناتكس يشوف لك حل ... والله العظيم جه في بالي انهم كلهم بيسفوا تراب قبل ما يغنوا فصوتهم بيطلع بالطبقة دي ... في فرق بين الصوت التخين او الاجش .. والصوت المترب اللي تحس انه عامل زي السجادة اللي نسيناها في ارضية البلكونة 3 شهور وفي فصل الربيع والخماسين كمان .. عشان كده يعتبروا مُتربين مش مطربين .... واللي عندهم دي مش احبال صوتيه .. لكن دي حبال غسيل ... وحبال ليف كمان يعني خشنة وتعور
يعني مجملاً .... موسيقى رزع الحلل بتاعت الدكتور هشام تعتبر لايت ميوزيك بالنسبة للي سمعته ... ودي بقى ممكن نسميها موسيقى رزع كل المواعين اللي في المطبخ مش الحلل بس ....
من الواضح طبعاً ان دي اغاني افراح بتعتمد على الإيقاع والرتم الواحد زي اغاني شعبولا واهي الناس بتبقى مدرمغه ومش فايقه ومش مركزة هي بتسمع ايه
بالاضافة الي انها بتتسجل تحت بير السلم ... يعني واحد عنده مكنتين اوكولايزر على كام شريط فاضيين معمول لهم ريسايكلنج اساساً على واحد مؤلف عامل دماغ بانجو زي الستاموني المؤلف المشهور .. على ملحن كان عازف ايقاع قبل كده وقالك ابقى عاصي الرحباني اشمعنى هو .... وعبي الشريط يا عم وبيع في اوساط الميكروباصات ونزل دي جيهات في الافراح .. واهي بتُرزق ......
انتظرونا في الحلقة اللي هاتكون قنبلة " ماذا فعل سين سين في الفرح الهابط اللي حضره من سنتين ؟ تُرى هل تم القاء القبض عليه متلبساً ومتكلبشاً بعدة قضايا في قلب الفرح ؟ "
ده اللي هانعرفه الحلقة الجاية
