جنت غافي بحلات النوم وسمعت الباب حيل اندك
كلت ياهو الأجه بنص ليل وياهو الي سال علحال وتفكد
صديق وجاي الي ايزور عدوي و جاي يتهدد
فتحت الباب شفت انسان مهيوب وقار البيه من جدمه لعد الخد
يباوعلي وباوعله وصفنه وصفنه جنه اسنين ردتني على عمري الضاع وتفرهد
اشوفنه سكت وسكته بيه الغاز ودري بسكتته اتعمد
وشوف الطيب بعيونه و سماحه ادور بكتاره وشوفنه ستر للناس ورايه على بخته بشاربه تنشد
وشفنه لبوي ايصير هو احزام والختي العزيزه ايصير هم معضد
وشوفه ايصير للجيران منبع خير ولأمي الحنونه الخدر وجرغد
وشوفنه درس وتعلم انا هواي من عنده ومثل ما تدرس الطلاب بالجامعه والمعهد
اعرفه...وما اعرفه...جني شفته وعمري خمس سنين موهسه العمر مبيوك وتفرهد
وخافني انشدة وفشله هاي اتصير وتردد
اشوفه نفذ صبره وسالني وكال انته اشبيك يا معود
انا الربيتك بحضني وعلى الذرعان تتوسد
انا العب جنت وياك بالحجله و انا الوياك يوم العيد دولاب الهوى نصعد
انا الافرح تراني من اشوف الهوى ايدغدغ بيك ودثرك بضلوع شما ردت تبرد
ومن ترجع تسولف قصة الدولاب لخوانك رباب واسعد وامجد
كل هذا الحجيته وما عرفته منين عرفني ابهويته وكال ....انا الجد ...انا الجد ..انا الجد
والقصه طويله واقعيه وجزت حد الحد
ورد النوب يسالني وبسؤاله ايريد مني اسعد
يجدي اشبيك ماتدري علينه اشصار تسال جايني على اسعد
اسعد راح للغربه ونسانه وايست منه وبعد ما رد
وصفن صفنه بكبر هذا الكون جنه ايكول وين امجد
يا جدي امجد صبح مجهول كالو مات من يوم الرصاص اشتد
صرخ صرخه طويله وفزز الميتين وراداها الرباب ايبوسه من الخد
اذا كتلك عليه وين هيه اصير اضن جفن عليك ايصير لونه اسود
رباب العسرت وي عسر هاي الناس وماتت بطواري بجرجف مسرد
لاتبجي يجدي ولا تظل محتار وكتم كل سؤال ولا تكلي اشصار
لان جرحي شرار ونار لان جرحي جبير وما يفيدة ازرار
اسكت لا تكلي اشصار ......
اجيت وجايني من بعيد قصدك تسمع الاخبار
اشوفك جايني وملهوف وشوفا بالعيون اللغاز ويه اسرار
تعال وياي خلي انشوف شنهي الصار
بالجاكوج صار ايأثر البسمار
وشفت اجفوف جانن ما يلوحن كاع شو صعدن على النجمات وجفوف الطوال اصفن هنه اكصار
وتدري الصار .. شفت كل الكبار اصغار وشفت كل الصغار اكبار
وتدري الصار .. شفت طير الكمل جنحه ابد ميطير وطير الماعليه ريش زغب شو طار
وتدري اصار .. شفت صوت البلابل على الشجر مذبوح وعليه تعزف حزن الاشجار والاثمار
وتدري اصار .... شفت كل الغلط مابين اهلنه ايعيش وشفت كل الصحيح احتار
وتدري اصار..... هم تقبل يجدي بهاي وهم تقبل ايبوك الجار بيت الجار
وهم تقبل يخضر على الورد حلفه وعلى اغصانه بوكاحه امجلب الزنجار
وهم تقبل نسد باب المظيف ونطرد الخطار
اذن حاتم طي خل يشك كبره وينفخ صور القيامه وينفخ بي نار
وهم تقبل حشف مذبوب يتعلى وتزود اسعره على البرحي وعلى الكنطار
وهم تقبل خشب مصنوعه منه اشيوف يتساوه ويا ذو الفقار
وهم تقبل قلمنه يلوذ بسكته وبعد ما نكتب الاشعار
عذرا على طول القصيدة ولاكن حجم الوقع كبير
تحيات الشاعر سلام الشويلي
العراق بصره
2009
