قنبله ابو ذيات

صرت انه السفينه وصار ربان
وعلى درب الكرم والدين ربان
ألك رب العرش لاتضن ربان
ومحمدنا النبي وحيدر وليه

ردت راحة بحياتي ماصحتلي
مغيمة وضيم تمطر ماصحتلي
اشوفك وكت خيرك ماصحتلي
عجب بلضيج بس تركض عليه

امتوني جفاك صدك خلعاها
وروحي من رداها خلعاها
ترى فراكك بوجهي خلعاها
الاعمى المايوجد صفن بيه


احس كلبي عليك اليوم لاعب
وكلام الخشن بطله وياي لاعيب
شجاني وطحت انا بعشك لاعب
تركني وفضل الطوبة عليه
ياترف نعجز ولا نكدر نصف يك
وربك بالحسن كلش نصف بيك
نص بيه صفة گلبي و نصف بيك
وضل يون عليك الباقي بيه


تدك دنياي وانه اردحلها
ومشاكل عندي وي ربعي اردحلها
قضيه البيني وبينك اردحلها(من الاحاله)
الى كلبي ويحله بساع اليه

تريد احزان فك الصدر بي كم
ولا واحد سئلني الجيب بي كم
مو شايل كلب ليكول بيكم
اذا كل ساعه يحب عشره سويه
احبك واعتذر منك وناسف
جمال ابروحك امغربل وناسف
احط ابروحي تي ان تي وناسف
وافجر روحي اذا تزعل علية

الدنيه وياي زعلان وردها
وهواها للنذل يزهي وردها
كلمااريد ارجعها وريدها
جفتني ولاتريد اترد عليه

حديقة بعلم رب الكون ظليت
وعن درب العلم ياناس ظليت
شجرة وبس على العاوين ظليت
صرت سايق مخدة وجودلية

نفر من كتله لج وصاح مالج
وصبر الروح اكلهه شبيج مالج
عشكتيلج حلو من بيت مالج
تعافه وذب سوادينه عليــه

آنه اول احبك 000واخراني
وسبب عطلني أجيلك 000واخراني
الكلب من ردت اشبكك000واخراني
ركض رايد يشبكك كبل اديه

بعيونك هواي اسرار والغاز
حتى جفنك علي صعب والغاز
ادور عليك مثل النفط والغاز
انقطع نفطك وشح غازك علية
الله من الگمر خالق وجه لك
أشلون أنساك يمعود وجهلك
أفكر بيك بكماطك وجهلك
وأحبك وأنت تلعب ليه ليه
بيدك فوضت نفسي تملك
والك منزل بدلالي تملك
وحكك لاتضن روحي تملك
اودك لوتراويني المنية

من حنة حنانج يمتة احني
يمتة اليوم باجر يمتة احني
دجيبي اكبر مدرس يمتحني
اودج بالعشك اخذلي 100


حبيبي صايم الله عليك بس مر
وريجي من غبت لليوم بس مر
وصرت خشبة وغرامك صار بسمار
وجواكيج الشماتة ادك علية


غدرت الگلب ما عاتب ولا لام
تفيض اجروح من عندي ولا لام
انه بعشرتك دينار ما عندي ولا لام
خسران العمر والبيه بيه

يروحي اشما تهيد النار وجري
ويجدمي بتعب لتهمين واجري
جزائي بشوفت المحبوب واجري
لأن شوكة غلب صبري علية


سهيت وشفت ساهي العين بسهاي
وكلبي مايحب اثنين بسهاي
من تغلط تعتذر وتكول بسهاي
رضيت وما رضت روحي عليه

ابيات ابو ذية بمنتهى الجمال والروعة احسنت الاختيار تقبل مروري

عاشت الايادي يا طبيه يا عزيزه تعجز الكلمات عن الوصف :ولاكن نستطيع ان نقول :رائع رائع رائع جدا جدا
جدا ............. نتمنى منك المزيد ؟.,؟.,؟.,

شكرا لك ولهذه الباقة المميزة من الأبوذيات
اختيار موفق
وانتقاء جميل
بانتظار المزيد منك
ودام لنا عطاؤك
تحياتي لك

غدرت الگلب ما عاتب ولا لام
تفيض اجروح من عندي ولا لام
انه بعشرتك دينار ما عندي ولا لام
خسران العمر والبيه بيه


مشكو حبيبي الغالي على البو ذيات الجميله تقبل تحياتي