صلاة الموت .............
******************
ميلادك الطف بعشــــره عاشور
وساعة مولدك لحظة مماتـــــك
حاير واعتذر وغلط بالحسـاب
وشعدن سيدي من معجزاتــك
اجه وكت الصلاه وي جية الموت
ولأن حسيــت منتهيـه حياتـــك
توضيـــت بدمه وكبرت مولاي
وعله راس الرمح صارت صلاتك
وصح صليت فرضك ونته عالموت
المهم صليتــه ماخليتــه فاتــــــك
وتدري انته على زينب بعدك تحير
وتــــروح الشام مسبيــــه بناتك
وقارنت الوضع وي ضيعة الدين
ويمــــــوت الدين مايقبلهه ذاتك
لذلك قررت تنتفض مــــــــولاي
وقرارك جان ثورة منجزاتــــك
وغلط من كال انته بعازة الماي
ولاجان الفـــرات بامنياتـــــــك
اذا انتــه الفرات وجنــــة الكون
اشوف الكون عطشـــان لفراتك
ومن صابت رضيعك نبلة الموت
رضيعك جان قمة تضحياتـــــك
شلـت الـــدم نثرته عله السماوات
وضربت ادروس في صفحة ثباتك
شلت الدم وصوتـــك صعـــــد لله
اخذ ياربي اخذ كلــه لرضاتــــك
يا اجمــــــل قتيل توصفك اعداك
مضمخ بالدمــــــه ونته شحلاتك
وحته بطيحتــــك ماتشبـــه الناس
اشو لمن طحت صرت شحلاتك
********************************
شاكر الشمري
