ياجسرنه الطاح بينه
ياجرف يعطف علينه
هالعمر تيه اسنينه
وضاع الاول بالتوالي
والله ذلتنه الليالي
***********
ياصبرنه العبر حده
وياوكتنه العينه رمده
كل شهم بالهم يمرده
والرذيل ايصير غالي
والله ذلتنه الليالي
************
من القهر شيب الراس
وانكتل بينه الاحساس
صرنه سالوفه للناس
وانتهينه اكراب خالي
والله ذلتنه الليالي
***************
ياهوانه الضاع منه
وياعمرنه الماتهنه
يادربنه الجان جنه
والكمر بينه يلالي
والله ذلتنه الليالي
*************
جنه عنوان الكتاب
وجنه لليسأل جواب
غشه ابدنيانه الضباب
وهدم بينه الجان عالي
والله ذلتنه الليالي
*************
شلون من طاح الجسر
شلون واحنه بلا عذر
شلون وشلون وسطر
ومن يجاوب عن سؤالي
والله ذلتنه الليالي
**************************
