اكبرنه بس مانشعر بطعم الامان,,,الا يم الوالده ام اجمل حظن
امي يامي يابيت اهلي الچبير,,,اصفى كل اگلوبنه واجمل وحن
امي بالماعون لو مدت الأيد,,,نعمة الله اتفيض بكتار الصحن
امي دمعتها بكبر نهر الفرات,,,وثوبها الاسود امطرزها بحزن
گلب امي بكبر خارطة العراق,,,يلمنه كلنه بلافظل وبلا منن
وأمي من تبتسم احلى امن الصباح,,,وأمي ضحكتها مثل جنة عدن
أمي بكرة خيط وتلفنه بحنان,,,والخيوط بغيرها يتخلبصن
أمي لاتقرأ ولا تكتب ابد,,,بس تحب الشعر تتذوق الفن
ماقرت امي القرأن الكريم,,,وحافظه اياته في ما أنزلن
أمي تعبت لمن سوتنه رجال,,,وأمي رجليها علينه اتفطرن
أمي طول العمر مرفوعة الراس,,,عيونها ليفوگ ابد ما دنگن
واذكر امي دنگت من مات ابوي,,,والشعر شيب والاضلوع انحنن
مساء المبارك ولو وجهچ بعيد,,,لكن عيونچ على بيتي ضون
مساء المبارك يالبوجهچ تلوح,,,الماء والخظراء والوجه الحسن
عندي حظنين وسواهن ما أريد,,,هن حضن الوالده وحظن الوطن
الشاعر :عادل محسن
