سبع ساعات أسولف وأتكلم وأستخف دمي
وهي تسمعني وتضحك ومبسوطه على الآخر
::
سبع ساعات أعلمها عن أحزاني وعن همي
وأسولف عن حكايا الطفل كان وصار هالشاعر
سبع ساعات تتساقط حروف الصدق من فمّي
على صحرا مسامعها سحاب العشق متناثر
::
سبع ساعات وتحلف لي براس العشق وتسمي
تقول أنت الوحيد اللي ملكني حبك الساحر
::
سبع ساعات ونادتني بإسمه ما هو بإسمي
تناديني فهد واسمي أنا ياللأسف... جابر
::
تشنج كل شيٍ كان حولي ومسمعي يدمي
ركز خنجر فهد في مسمعي من صوتها الخادر
::
تخدر فكري وجسمي وذاب بداخلي عظمي
وصرت أسمع صدى صوتٍ يردد غلطة الشاطر
::
يردد غلطة الشاطر بعشرة واقعي وحلمي
وترددها زوايا غرفتي والواقع الغادر
::
كثير أصوات شقت جلدي اللي يحتضن عظمي
وصراخ الباب والدولاب والشباك والساتر
::
وونات القلم والدفتر اللي يلتفت يمي
وخايف وش أبي أكتب بوسطه من هنا لـ باكر
::
وكانت ساكته وصوت النفس من خشمه و خشمي
ربع ساعه وبحة صوت قالت خير وش صاير
::
وقلت أبداً مغير الخير ولكن امسحي رقمي
أكيد أنه فهد جالس سبع ساعات وهو ناطر
::
وقالت لي رجاءً أو أقولك طير ياعمي
مسوي حضرتك في هالزمان العاشق الطاهر
::
وقالت لي اقول وقلت أنا بقول وذا علمي
عجب هالناس وش هالناس تخطي وبالخطى تكابر
::
أنا يابنت بنثر لك حياتي واجمعي لمي
بعضه بنثره في مسمعك هالحين ومن خاطر
::
ترا عمري أنا تسعه وعشرين وكذا رسمي
ولكن عشت أيامي دبلها مقبل وعابر
::
أصيل وكل أصيل مايبي مدحي ولا ذمي
وسبع أنعام في هالناس أخص الحامد الشاكر
::
أنا جابر ولد هايف وسلم الطيب هو سلمي
أبوي اللي مربيني على الجزلات وأتفاخر
::
أنا راعي مجاهيم يشع بفخذها وسمي
وراعي خيل وراعي بير وبيتٍ مبغضه كافر
::
على الرمضى أبت رجلي بأرضٍ عاشقه ضمي
وشمسٍ تشرق وتوقف على راسي وأنا صابر
::
عرق وجهي يصب وأمسحه بشماغي وكمي
وألد عيوني عن ناسٍ سرقني يمها الناظر
::
وأنا شاعر ولو أكتب عجز كل فكر في نظمي
ولاني بالغرور أحكي ولكن واثق وقادر
::
وأنا رجال هاوي للقمم ويقودني عزمي
وأبي أرقى على راس الجيل وأنتي مع الحادر
::
عرفتي ليه أنا طاهر لانك همي وغمي
ولأن الدنيا في عيني جبل نرقاه ونغامر
::
يابنت الناس شفتي كيف بليّا سلاح مانرمي
ولانوقف بوجهه البندق المليان ونخاطر
::
خلقنا الله بشر بعقول وذا واقع وذا وهمي
وكلٍ يتبع مراده وفينا رابح وخاسر
::
وقالت لي فمان الله شعلت النار في جسمي
فمان الله يالطاهر ومثلك قله ونادر
::
ورحت أخذ كتاب الله وأحلف بالكتاب امي
لو أن اسمي فهد بالله ماكان أحلى من جابر..؟
وسلامتكم
مما راق لي
شــــعــــر / جـــــــــابر العـــتــيــــبي
