اليكتب شعر هم لازم ايخاف
اذا كال الحقيقه وظهر ماعنده
للرحله الطويله ايحضر الروح
واصبع كل قصيده ايغمج بلحده
جفنه اوراقها حبر القصيده ادموع
لسعات الجمر نزلت على خده
واقلامه التشيع وخشب للتابوت
فصلهن حمد بالزغر من مهده
ماضاك الرطب اومن فيها محروم
وسلاية نخلته نايمه بجلده
حمد عطشان يمه النهر خنياب
ومن يوصل لشفته الماي يتبده
حمد كل يوم عده الجوع خطار
ريوكه وعشاه وحين يتغده
حمد وردة اشته يكطعها فد يوم
وكبل مدت ايده انكطعت الورده
ملتم الحزن والالم والحرمان
ويه الظلم كلها اتعاونت ضده
حمد ايوب لاتظن وهمت اسماء
جزه بصبره صبرها الدنيه وتعده
مامره شكه من حز ايديه الكيد
بنيابه يكطع العوز والشده
ابد ماحنه الهام ورجفاه الخوف
حمد سجه المصايب منها تتعده
يزك ياكلب عيب الملحه البيك
لاتنشد حمد اشجاب وشوده
حمد بطن السواد الشالته اشهور
وبظهره ظهرها جانت اتشده
اذا ما در ثديها الحمد تنخاه
يشكلها نهر شريانه ويمده
حمد بحر الوفه والعشك والطيب
ومن غصبن عليها الوادم اتوده
حمد خيل العشاير لمن اتغير
حوافرها اثر لليعبر السده
تنخاه الرماح وهدة السيف
حمد كل الشهامه لابده بسده
اهي وشالة صبر احذرها حين تطيح
بركاب المنايه سيفها اتحده
حمد طيب اصيل ويوفي للموت
حاشاه اللعب والغدر والرده
حمد شاعر عراقي وعده وجدان
تجرّه وخاطب الوجدان ماعده
لجن يبكه جريء وبيض الثياب
حلوه شماكبر حلوه اعله كده
