بسد طولك اذا نتمشه متغاوين
يمن تهوى الخياله عيونه تباوع
تتمايل طرب الكاع وبممشــاك
بتهوفن عشك غازلها كل شارع
شارعنه يدور لو غبت لحظــات
مابين الشوارع ينشد وضايـــــع
زرك منا حبيبك وراجع الحين
يدرون برواحك وشوكت راجــــع
حلو كلك حلو رغم اللواعه البيك
وبعد اكثر حلاتك لمن اتـــــلاوع
من ليلك صبحنه لامته الناس
شعندك ياصبح ماتخجل وطالع
خلي الليل فارش كوشت العشاك
خزينه انفتحت الكل الودايـــــع
يملوحة حياتي وتمصخ ابلياك
وبدونك شهدها حنظل وكاطـع
ياوردة اووكته لسه ماحان
عله خدها النده من الخجل ناكع
لتاج الحسن رشح شوفها شلون
تيجان الحسن لجلك تبايـــــــع
خلي الناس عني تكول جنيت
وخلي اتكول خالفت الشرايع
وخلي تكول عني مخالف القانون
حرام ومنعته كل المراجــــــع
ابوسك قررت صدكني والعباس
ولو بالموتاحصل بوستي قانع
تسوه البيت الابيض اوول ستريت
يبوك الحسن منك صار اله وازع
ادري الروعه كلها ربك انطاك
لجن وصاك ويانه التواضـــــــع
متواضع حبيبي مثل الجبال
العراق شما عله طبعه التواضع
