أولـى مشــاركـاتي معكم (عــــــــشــــــــرة أبــــــــوذيــــــــات) عبدالله الرفاعي

بحب الوطن اذكر وصّى بونه
لچن صابوا وطنّه وصابونه
بدموع اغسلنه دينه وصابونه
من كلمن زرع هالطائفيّة
===============
شهر دهري سچاچينه وحدهه
چي مالي ظهر روحي وحدهه
شتات الوادم ودهري وحّدهه
ضدي تريد كلهه النهش بيّة
===============
سكران ابمحبتك وانتة كاسي
وغرامك سبب علتي وانتكاسي
وسامي انتة ومرادي وانتة كاسي
واريد اربح وارفعك بين ادية
===============
دموع العين من غدرك تجّاره
واضن حتى العشگ عندك تجارة
أهجرك ردت لنك ما تجّاره
واعوفك ويّه قفل الأبوذيّة
===============
دليلي بنار حبكم شاعلينه
وجفاكم خبر ياذي وشاع لينه
حرگتوا گليبي گلتوا شعلينه
واضن حبكم شعل هالنار بيّة
===============
مميز بين صحبانه وجيله
يمرمرني أحب وصله وأجيله
وجيت الروح كل ضني وجي له
شو ناري أصبحت مشتعلة بيّة
===============
عزيز وما يصح واحد بدالك
واضن كل العشگ منّي بدالك
شجاك ومنهو العليّة بدلك
أخاف أسباب هجرك طائفيّة
===============
ندم گلبي وتعذّرلك وردلك
واضن مكتوب من عنده وردلك
نذرت العمر بس اجمع ورد لك
واضن النبي ما رد الهديّة
===============
شكثر ما تحب بيّة أكثر أحب بيك
ومن تزعل أحب خدّك وأحب بيك
تعرف شنهو يعجبني وأحب بيك
من تزعل وأضمّك بين اديّة
===============

عليّه أتعاونوا خلي ودهري
وخلي شكثر متعافي ودهري
تعرف شنهو لبالي .. ودي أهري
گلبك و انتقم منّك بديّة
===============
بقلم
عبدالله الرفاعي

والله والنعم منك
صح لسانك عزيزي الرفاعي
مشاركة جدا رائعة باحساس جميل
وبداية حلوة معانه -- ننتظر جديدك
وحياك الله

ابوذيات رائعة عاشت الايادي
اهلا وسهلا بك اخ عبدالله الرفاعي منور المنتدى بتواجدك
ننتظر منك المزيد
تحياتي ومودتي

عبد الله الرفاعي
اود ان ارحب بك كل الترحيب معنا هنا في منتديات الفرات
والمنتديات الادبيه خاصه
بدايه موفقه معنا
سلمت اناملك على هذه الابوذيات الجميله

تحياتي

العراقي

سكران ابمحبتك وانتة كاسي
وغرامك سبب علتي وانتكاسي
وسامي انتة ومرادي وانتة كاسي
واريد اربح وارفعك بين ادية
اهلا وسهلا بك اخي الرفاعي
ارجو ان تقبل هذا الرد
صار الكلب كاسك وأنته كاسه
وخسران اليعوفك ونت كاسه
اذا العب نهائي وانته كاسه
اشيلك حتى لو خسران ميه

دليلي بنار حبكم شاعلينه
وجفاكم خبر ياذي وشاع لينه
حرگتوا گليبي گلتوا شعلينه
واضن حبكم شعل هالنار بيّة
بداية موفقة
أهلا وسهلا بيك يالغالي عبد الله الرفاعي
منور منتديات الفرات

بدايه موفقه وعاشت ايدك
حياك الله وننتظر ابداعاتك ومشاركاتك الحلوه
دمت بالف خير

اقتباس:

---

المشاركة الأصلية كتبت بواسطة ام فيصل

والله والنعم منك
صح لسانك عزيزي الرفاعي
مشاركة جدا رائعة باحساس جميل
وبداية حلوة معانه -- ننتظر جديدك

وحياك الله

---

ام فيصل الغالية
تحياتي لك ولاحساسك الرائع
مرورك اسعدني وانار الصفحة
احترامي لشخصك المحترم