الدليل القاطع عند ابو كاطع ج8

بسم الله الرحمن الرحيم
ايكولون من تحجي شاهدك وياك
في زمن العهد الملكي في العراق وفي وسط الخمسينيات كانت الطرق بين مركز المحافظات والاقضية والنواحي غير مبلط الا ما ندر
يعني تراب بتراب
اغلبكم او الكثير منكم سامع بمنطقة غماس المشهورة بالتمن العنبر ابو الريحه الغريبة العجيبه بعطرها الذي يعادل المسك ومن اسم العنبر استوحى عطر اسمه العنبر
خلي هسه العنبر على صفحه نرجع لسالفتنا
كانت الطرق ترابيه والسيارات تعد على عدد الاصابع بين مركز المحافظة والناحية او القضاء وفي احد الايام
كان مدير شرطة قضاء الشامية التابعه له ناحية غماس واقف على الشارع الترابي ومعه حمايته
بس شكد حمايته ياحبيبي سادين عين الشمس
ولابسين نظارات سود
وما ادري ليش يلتفتون يمنه ويسره
مكرود
شرطي واحد وعده بندقية طويلة الشكل اسمها سمينوف على ما اعتقد
لايزعلون علينا الخبراء والمحللين العسكرين
ان اخطاءت في اسم البندقية

خو ما عدكم محللين عسكرين استرو علينا لخاطر الله
على كل حال واذا بسيارة نوع شوفرليت موديل 1948 بودي خشب الان موجوده في محافظة البصرة بكثرة
ويا محلى البصرة
على كل حال الشرطي الحماية
ها انتبهو الحماية بس اشلون حماية لابس بنطرون نصف كم والسدارة مهودله صفح والتراب ماكل وجه ومدير الشرطة واكف يم سيارته ويسمونها المسلحة ايام زمان
وقف السائق مال السيارة
وكان من اخواننا الاكراد الله يستر عليهم ويحفظهم ويديرون بالهم علينا بلكي اشوية يفتحون مجال انريد انروح بالصيف للشمال وناكل عنب اسود
الله كريم
وكف السائق
وكل للشرطي
ها كاكا شرطي انتي شيريد
كاله ولك انزل مدير الشرطة ايريدك
نزل السائق سلم على مدير الشرطة وكال لمدير الشرطة والله اني كله تمام
كله مدير الشرطة بابا اني مو شرطي مرور
بس اريد اسئلك اشلون مركب ناس فوك ظهر السيارة متخاف يوكعون
هسه اتنزلهم اهنا وتروح لناحية غماس اتوصل الركاب الي داخل السيارة
وترجع تاخذهم الى ناحية غماس مرة ثانية
اخونا الكردي كاله
انت صدك يحجي
هازا كلام مومعقول شنو ينزل شنو يروح شنو يرجع
هازا امانة بركبة مال اني لو يموت ما ينزلهم
ولشهامته اكرمه مدير الشرطة في حينها بربع دينار
الله اعلم هسه اشكد يعادل وفق الميزانية الجديدة
وما نزل الركاب
\\\\\\\\\\\\\\\\\\\\\\\\\\\
شنو الي تريد توصله
خوش سؤال
اليوم صباحا اطلعت على خبر ذكرني في هذه القصة
بس الاختلاف
بدل السيارة
طائرة
بدل السائق الكردي البطل
كابتن الله اعلم المن تابع
بدل مدير الشرطة
جهات امنية
بدل غماس
الى جهة مجهوله
\\\\\\\\\\\\\\\\\\\\
اني لست من المدافعين على اي اسم سوف يرد اسمه في هذا الرابط ولا اعرفهم لا من قريب ولا من بعيد ولست مدافع عن مذنب ام بريء
اني فقط اقارن بين تصرف السائق الكردي البطل ومدير الشرطة وبين ما موجود في هذا الموضوع
شنو الموضوع
الدليل القاطع عند ابو كاطع
مع اعتزازي وتقديري واعتذاري من الاخوة الاكراد ان اسئت اللفظ في مفردات شخصية السائق
والعهدة على هذا الرابط
http://www.ipairaq.com/index.php?name=inner&t=politics&id=9526

اتحفنا وزدنا طربا وشجونا:2:

ماكل من طلب السعادة نالها
وما كل من قرأ الكتاب فهيم


ابدعت لكل من يريد ان يعرف معنى الكلام ومغزاه
والذي لايفهم ليبقى لايفهم:66 (75):
الف تحية وتقدير

الاخ ابو كاطع الموضوع جميل, ملاحظتي عليه هي العنوان لو كان لكل موضوع عنوان مرتبط بالقصة افضل من نواحي كثيرة.

للاسف عندما تتقاطع المصالح نرى الاوراق تتصاقط, انا لست مدافعا عن النائب او غيره و لكن اتمنى ان مثلما مجلس النواب رفع الحصانة عن هذا النائب يرفع الحصانة عن الباقين ممن تلطخت ايديهم بانهار الدم العراقية

الغريب بالموضوع ان الطائرة اقلعت !
يعني لماذا اقلعت و هو على متنها و لماذا تعود
المفروض اما لا يسمح له بالمغادرة او يهبط بالمكان المتوجه اليه يعني صراحة لابد ان اسجل مدى الغباء في جعل الامور تاخذ اكبر من حجمها, شخص يحاول جاهد ان يحرك شيء لصالحه و ان شاء الله اكون غلطان.

تقبلوا تحياتي

وكيف لا نعرف غماس والتمن العنبر

بس تدري خويه ابو كاطع بعد ما عدنه عنبر ولا تمن اهل الكروش هوايه وخلصوا العنبر والتمن الي بالعراق وصرنا نستورد تمن تايلندي ومن هل السوالف

خل ارجع وياك لسالفتك الي مثل الماي على الجرح

والله يااخي انت مبدع بكل معنى الكلمه

وكلامك ذهب وفعلا الدليل القاطع عند ابو كاطع

احسنت وبارك الله بيك

وننتظر المزيد يابطل

اقتباس:

---

المشاركة الأصلية كتبت بواسطة foraten.net/?foraten.net/?foraten.net/?foraten.net/? foraten.net/?foraten.net/?foraten.net/?foraten.net/?foraten.net/?foraten.net/?foraten.net/?

الاخ ابو كاطع الموضوع جميل, ملاحظتي عليه هي العنوان لو كان لكل موضوع عنوان مرتبط بالقصة افضل من نواحي كثيرة.

للاسف عندما تتقاطع المصالح نرى الاوراق تتصاقط, انا لست مدافعا عن النائب او غيره و لكن اتمنى ان مثلما مجلس النواب رفع الحصانة عن هذا النائب يرفع الحصانة عن الباقين ممن تلطخت ايديهم بانهار الدم العراقية

الغريب بالموضوع ان الطائرة اقلعت !
يعني لماذا اقلعت و هو على متنها و لماذا تعود
المفروض اما لا يسمح له بالمغادرة او يهبط بالمكان المتوجه اليه يعني صراحة لابد ان اسجل مدى الغباء في جعل الامور تاخذ اكبر من حجمها, شخص يحاول جاهد ان يحرك شيء لصالحه و ان شاء الله اكون غلطان.

تقبلوا تحياتي

---

السلام عليكم ورحمة الله وبركاته
يشرفني مرورك العطر
واني اقدر فيك روح الشجاعة والنقد الجميل
بالنسبة لما تفضلت به بخصوص العنوان وربطه بالقصة
اني اخالفك الراي لماذا ليس لان ما تفضلت به خطاء ابدا
لكن اني اخترت العنوان
الدليل القاطع عند ابو قاطع
من برنامج اذاعي قديم جدا في زمان البطل عبد الكريم قاسم رحمه الله
وكان يبث يوميا مساء واسمه
احجيه بصراحه يبو كاطع
وكان برنامج لاذع وفيه نقد جميل جدا
وكان مقدمه الله يرحمه يبداء قصه ويربطها بحدث معين وفي اخر الحديث
يقول
احجيه بصراحه يبو كاطع
في كل الاحوال انت متفضل بمرورك ومشاركتك ورسالتك التي بعثتها لي
الف شكر وعلى راسي

يا هلا وكل الهلا بيك يا ابو كاطع وحيا الله سوالفك والكعدة الحلوة وياك

ويامحلاها من كعدة ترد الروح وتعلمنا دروس وعبر راقية

بارك الله بيك ووين نلكاه يا خوية الكاكا هذه الي ما يترك صاحبة هسة الجماعة سوو مثلة يعني .!!

عاشت ايدك

ودوم ننتظر منك كل جديد خوية

كل الشكر والتقدير لك مني