ذكرى الهالجرح يوميه شو تنعاد
وكل اربع سنين الوطن يتأمل
وغيوم الحزن تمطر دموع ايتام
وادموع الفقير بخده تتسلل
حاكمنه اعتذر ..مايمسح الدمعات..
خاف ردان قاطه الغالي يتبلل
محتاج الوطن انسان عاش جروح
ومن جهد الجهد بس للوطن يبذل
فلاح انت ازرع ضحكه بين الناس
ساعتهه بديك انصير الك منجل
لاتبخل ابد هذا الوطن تعبان
رايد راحه منك فدوه لاتبخل
بستان الوطن والشعب كله ورود
وتره بموت الورد حته الله مايقبل
اخذ كل النفط بس لاتاذي الناس
ميجف النفط بس الورد يذبل
محتاج الوطن انسان عنده احساس
مو بارواح شعبه يتاجر ويهدر
لازم يغفه وي جفن اليتيم ينام
وبهموم الارامل يكعد يفكر
وبيت الكل فقير انهدم بيته وضاع
وشال بلاذنب بجروحه متأثر
بس هي المصيبه الشفت بيهه الضيم
وضعنه شكد نحس لليوم متأخر
لاشارع تعمر لابنيت بيوت
أي متكلي شوكت يمعود تعمر
تعبني الصبر وبكلبي فات السيف
اكلك ميت اني تكلي وك اصبر
شصبرلك بعد وك انه بييه جروح
وي ميل الثواني بكل وكت تكبر
شصبرلك بعد ضاع العمر وانزاح
يلوعودك عجيبه بسرعه تتبخر
تزرع بالجذب مادري صبخه الكاع
وانه اترجه زرعك باجر يخضر
ذبيت المناجل من شفت عاكول
وصفه المنجل خطيه من البجي مزنجر
محتاج الوطن فارس مثل عباس
من شاف النهر مافكر هوايه
لان يعرف اخييه حسين ضل عطشان
دفع نهر الفرات وماشرب مايه
كص راس العطش ماذله صوت الماي
ولا نفسه دنت ماهمته الغايه
ومن رد البطل واكف اسد ضرغام
ذب جفوفه خاطر يحضن الرايه
احضن كاعك انت الوطن رايه شبيك
ولتأملنه كلنه بكلمه وحجايه
اجه وكت الفعل شوفونه راحه وخير
منريد بهواكم نصفه كشايه
شرايه احنه كلنه وبس امان نريد
اذا عدكم امان نصير شرايه
:66 (46): اتمنى يعجبكم :66 (46):
منقول
