أحاول أوصف احساسي تجاهك وانثر الامطار
أحاول.. بس يا الغالي شعوري صعب تفسيره !
انا من يومني بنت صغيره والقلوب كبار
بلاني ربي بحبك , وعشت بعالم الحيره
أنا من يومي طفله وانا لي بالهوى تذكار
عشقتك من صغر سني , يا زين الوصف والسيره
صحيح اني صغيره حيل , ومن حولي بنات صغار
صحيح همومنا لعبه , وكل أحلامنا صغيره
طموح البنت في عمري , عروسه ولعبة استشوار
وانا كل اهتماماتي , عيونك ياضيا الديره
في مدرستي عجزت أفهم دروسي والبلا أفكار
أفكر فيك يا الغالي .. وزاد الشوق تفكيره
أنا ما همني درسي .. ولا هموني الشطار
تجاهلت الفصل كله .. عباراته .. طباشيره
الا ياليتني بنت(ن) , تعرف تنظم الاشعار
يمين الله لأكتب لك قصايد تفضح الغيره
كبرت اليوم يا الغالي وزاد بقلبي الاصرار
على حبك , وحب اللي يحبك فاق تعبيره !
جذبت عيوني الاثنين الا يا ملفت الانظار
سكنت حدود نبضاتي , بدون اجراء تأشيره
فداك اللي تريد آمر , تمنّى يالغلا واختار
لو انك تطلب عيوني , لأقول ان العمى خيره !
جميع اللي تريده حاصل , حشى ما أنطق الاعذار
ولو يتعذر قليبي , حشى مااقبل معاذيره
قالوا لي تحبينه ؟ وقلت ان الحروف كثار
أحبه واعشقه واهواه , ولا أرضى بتغييره
شجاعه , بس لا شفتك , كياني يا بعدي ينهار
قويه , لكن قبالك , شعوري صعب تظهيره
عيونك يا بعد كلي , تهز الفارس المغوار
شموخك مفخره للعز , يذكرني بأساطيره !
الى مني تباطيتك , تولّع في حشاي النار
تزوّد جرعة الاحزان , تزيد القلب تخديره !
واذا يا عيني لاقيتك , يثور بداخلي اعصار
أطير بعالم الفرحه , تقيّدني اساويره
لو انك تدري بحبك , كم له داخلي مقدار
يطير العقل يا الغالي , كأنك شارب(ن) بيره !!..
