الى سيدي ومولاي زين العابدين ع

يامنبع علم = ياسيف وعزم
نهجك والفـــــــــكر
يضوي ابكل عصر
يامنـــــــــــــبع علم
***** *****
فكرك منار ابكل وكت يضوي اعلوم
فكرك صراط المؤمن ابذاك اليوم
لنـّـك اساسه الثابت وبيك ايدوم
هذا الثبات ايدل عليكم معلوم
من عدكم عله = لنكم منهله
يتحدى الشدد
فكرك كل عهد
يامنبع علم
***** *****
فكرك جزه اعله السيل وتعدى ابحور
فكرك انيس الكل گلب فكرك نور
فكرك يداوي امراض ويشافي اصدور
فكرك حصن للمحشر وفكرك سور
فرع من الاصل = فكرك يانفل
من سيد البشر
من فارس مضر
يامنبع علم
***** *****
يامدرسة علم النبي وداحي الباب
بحر العلم ليك انتسب من اطياب
ارض وسمه وبر وبحر علمك صاب
ياعلة التكوين واصْـل الاسباب
بيكم نوّرت = دنيانه وزهت
والباري انعبد
بيكم وانحمد
يامنبع علم
***** *****
يامنبع الجود ومعاني الاحسان
بحر الكرم لمـّن طفح صار السان
ياسيف يتحدى الظلم بالايمان
اسمك يظل رايه وترف بالاوطان
يالبيك ارتفع = هذا المجتمع
مابين الأمم
وتـْـعله القمم
يامنبع علم
***** *****
يامن ورث صبر النبي وداحي الباب
يامن ورث حلم الحسن لمـّـن غاب
يانور من نور انتقل بالأصلاب
شامخ تظل لاتهتز ولاترتاب
وراث كل فعل = من سيد الرسل
چلماتك عهد
تاريخك شهد
يامنبع علم
***** *****
بالمعرفه داويت جرح وآلام
يامن خذت من صبره عبره الايام
هذا الصبر ليك انحنه وطخ الهام
وتـْـوسم ابأسمك فخر ياضــرغام
بحر من الصبر = وبصبرك جمر
يسعر بالگلب
علْ ظل عالترب
يامنبع علم
***** *****
ياعين شافت ضيْها مابين الخيل
من طاح والراس ابرمح دمـّـه ايسيل
ياعين شافت زينب ابذاك الليــل
تنخه ابعشيرتها وتحشم اهل الحيل
تـنده علْ أهل = وتـْـهيج العلل
ونته ابهل ألم
عينك عالحرم
يامنبع علم
***** *****
مولاي چم هظمه وجرح من ظلاّم
گلبك حمل من كربله لرض الشام
من شاهدت خدر العقيله وأيتام
عگب الگمر وحسین عگب الاکرام
حاديـّـه الشمر= يزجرهم زجر
من عگب الاهل
ظل بيك الأمل
يامنبع علم
***** ***** *****
******** سعد الياسري ***********

السلام عليك ياسيدي ومولاي يا علي السجاد ورحمة الله وبركاته
عاشت ايدك اخي ابو امير الياسري
قصيده رائعه جعلها الله في ميزان اعمالك
تقبل مروري وتحياتي

الله يجزيك الخير عزيزي ابو امير

قصيدة رائعة سلمت يداك

والف شكر لك

السلام عليك ياسيدي ياسيد الساجدين

السلام عليكم اخي هاشم والاخت ام فيصل
دعائي لكم بالتوفيق دائما واشكر لكم مروركم جزيل الشكر