فصلت العمر دمعه على كد طرواك
وادري من ابجي صوتي بونتي اتسمعه
العيون بحر من تتلاطم من ابجيك
اشكبرها من البحر لو نزلت الدمعه
السيوف من الغمد ما طلعت اتعاديك
بس رادت عليك تلطم امفرعه
دم طفلك شمرته وما نزل للكاع
اذن املاك نزلت من السمه اترفعه
دم طفلك سمه ومناك سبعه يصير
دم الثامنه ينضاف على السبعه
عبيد اهواي جانوا للفرس والتاج
ودمك ثورة صار اكلوب التتبعه
دمك من وكع نور وبقه لهليوم
على كل ظلمه دمك ينبثق شمعه
الكفر فوك الرمح من شالوا القران
نعرف بيها جانت سيدي خدعه
مو حبا اسمكم لأن بيه موجود
رادوها الرماح اتشكه واتشلعه
ما محني أبد كبلك عدل كل سيف
واكف وكفه ابد ما منحني بطبعه
بس لمن طحت دمك بجه وللحين
ظل محني عليك ومنكسر ضلعه
وظل قران جدك ينزف ومجروح
والقران جرحه اشكبره واشوسعه
وتدري ضماده دمك وانت التداويه
ونزيفك جرعه انت اتلفه واتكطعه
ومو فوك الورق صدكني عدنه اركاب
على حبال المشانق لجلك اموقعه
للشاعر الحسيني
عباس عبد الحسن
