عندما تلتف خيوط الرجعه على عنق القرار (غربة السياب )

راح اسافر ...قررت لبعيد اسافر ..

بلكي انسه من التعب ساعة نهار ...والكه ساعه ارتاح بيها ابليل باجر ..

حضرت جنطتي ابايدي ...وقررت من غبشه اسافر

وقررت بالجنطه اشيل كلشي احتاجه ابغربتي قلم واحروف اودفاتر

او وصفولي اشلون بالغربه القلم يكدر يبوح ...

اويرسم الصوره اعله كيفه والتعب ما يوصل ايده ...

فلذلك قرريت اخذ ابجنطة سفرتي أي شي حتاجه ابكتابة

أي قصيده ...

ولان مشدوده القوافي ابماي دجله ...

قررت بالجنطه اخذ

ماي دجله ....طين دجله ...جرف دجله ...سحر دجله ..

حته من اكتب قصيده الدنيه كلهه ابعيني تحله ...

والشمس تكعد اكبالي واكدر اخذ من شعرها الزاهي خصله ..

وخاف دجله اهناك تشعر بالشتات ..

واعله خدهه اتطيح دمعه من يحل وكت الصلاة

قررت وياهه احط نهر الفرات ...

والفرات اشكد حنين ...وانه اعرفه اشكد حنين ...والله اعرفه اشكد حنين

اوخاف هم اهناك شوكه ايزيد وايتعبه الحنين ..

قررت وياه احط عشك السنين ...

عشك كلبه الماتعب ....

عشك مايه الكضه عمره ايحني بجفوف الكصب ...

عشك عينه المانشف لحضه دمعها ...خاف لا ينشف حلك شط العرب ...

فلذلك قرريت اويه الفرات او دجله احط شط العرب ..

واخ من شط العرب ...هم اعرفه ..

ايرد زغير اشما كبر...

ولان جنت امن امر (بالكورنيش ) اسمعه ايردد انشودة مطر

(مطر ...مطر ...مطر ...وفي العراق جوع )

وخاف لا شط العرب يسالني غاد اعله المطر ...

قررت وياي اخذ (عيناك غابتا نخيل ساعة السحر ....اوشرفتان راح ينأى عنهما القمر )

ولان ادري (ابغربة السياب )عله ...المالكه ابغير الوطن يرهم دواها ...

وبعد ادري جان يوكف عالخليج ...اويرسم اعله الظلمه شمس الرافدين

اويبقه يحلم يم ضواها ....

ولان اعرف هالعباره الكالها السياب امس

(الشمس اجمل في بلادي من سواها )

قررت بالجنطه احط قرص الشمس ...

ورتبت بالجنطه كل اللي اريده ...

اوحضرت دفتر جوازي اوحضرت وياه فيزه ...

اهناك لن الجنطه صاحت ...خاف بالغربه تحن للناصريه

(وللناصريه ...للناصريه ...تعطش واشربك ماي بجفوف اديه )

وانه ادري الناصريه اشكد عزيزه ...

روح ودي ابسرعه طارش ....

ايجيبلك سوك الشيوخ امكبع ابهور الجبايش ..

اوحانت الساعه اوكلت خليني اسافر

او بالمطار جانو ايحسبون كمرك عالجنط

ومن وصل ليه السره كلشي ابحساباتي اختلط

والاجه ايوزن جنطتي كالي اشكد انته خاسر

العنده مثلك هيج جنطه ...كفر للغربه يسافر

روح رد عمي الهلك ..انه لو منك اموت اولا يمر بافكاري باجر

فلذلك قررت ما اعيش باجر

او ما اسافر
\\\\\\\\\\\\\\\\\\\\\\\\\
للدكتور فلاح الزيدي
ولكم مني احلى باقة ورد

ولان مشدوده القوافي ابماي دجله ...

قررت بالجنطه اخذ

ماي دجله ....طين دجله ...جرف دجله ...سحر دجله ..

حته من اكتب قصيده الدنيه كلهه ابعيني تحله ...


اللــه اللــه عليك سيدي الصــكر

اختيــار رائـــع

طــكن الدمعـات بعيوني .... وكلبي حــن

كلي ويـن احله من العراق -- تلكــه وطــن

ويـن تلكـه الهور مثله بليل لو مايه سكن

وناي العمارة يدكله ويكتب بحزنه الشجن


الغــــربة -- موبس غربـة وطــــن

الغـربة -- غربـــة روح محتاره ,,, ودمـــوع ٍ جــَرن


مشكــور عزيزي هيجـــت المــواجع

وتحياتي لهذا الذوق الرفيع في الإختيار

العنده مثلك هيج جنطه ...كفر للغربه يسافر

البس اسود وجاوبك .....:66 (185)::66 (185)::66 (75): اني جنطتي هيه الودتني عل كمارك
والسياب جان جنطه بيد العراق وما فتحها الا من وصل للكبر :66 (185)::66 (185):ومن فتحها لكه امرايه وشاف روحه......
ابو علاوي ال:66 (6): .....اتريكت بالعبره من فتحت موضوعك .. بس والله صار طعم الاكل اطيب جان ماصخ...تحياتي يا بعد روحي يا عراقي يا اصيل ......
اني دجلة وانته الفرات وكلبي جنطه راح احط بيه الفرات خاف اشعر بالضياع

تحياتي الك حبيب كلبي

شكرا حبيبي الصكر للاختيار المميز وللدكتور الزيدي
كلمات تنساب كنسياب شط العرب
وترسم صورة السياب وهو يتامل المطر وبيويب وشط العرب
رائع انت اخي الكريم وتقبل مني المرور

عشك كلبه الماتعب ....

عشك مايه الكضه عمره ايحني بجفوف الكصب ...

عشك عينه المانشف لحضه دمعها ...خاف لا ينشف حلك شط العرب ...

فلذلك قرريت اويه الفرات او دجله احط شط العرب ..

عاشت ايدك اخي ابو علي الصكر على هذه القصيده الرائعه
والكلمات الحلوه لشاعرنا فلاح الزيدي المبدع
تقبل مروري وكا امنياتي لك بالتوفيق

تسلم ابو علي دائما مميز حتى في نقل القصائد الجميله للشاعر الكبير الزيدي تحياتي الك بقدر حب الوطن المرسومه في قصيده الشاعر مع حبي واحترامي

شكرا الك اخويه العزيز
على الاختيار الرائع
وعلى الذوق الجميل
تقبل تحياتي