طيور بوكه
يا طيور المن تغنن
لا زرع لا ماي
لا ريحة مسج لا ياسمين
ماكو في الجن تهجعن
لا ذرة ولا ظل
ولا نسمة حنين
غفرة مزروعة بحجر مفخور نار
وبدل من زرع الشجر
نزرعت بشوك الحديد,والحديد أنزرع مثل البساتين
وآني تدهشني العصافير البريئة
عجب! عفتي النهر والفي وحلاته
ليش عفتي الجنه بييهه الرياحين
وليش هالعش صاير بنخل الحديد
وسعف ثابت ما تهزه الريح لحظه
وياسعف هذا الميهتز وحره مثل البراكين
وأنت حر ياطير جنحك,
ويا مكان يعجبك توكر عليه لا بجيم ولا بسين
روح لبيوت الفلاليح وزرعهم
أسمع سواليفهم وأطرب عليهه
ساعة الجاي المهيل على الفحم المخدريين
أبني عشك بالبيادر
بين طوفات الشلب
والشلب يا طير عنبر عشك ماي الدهله طين
روح للعشار يم شط العرب,روح يم سوك البنات
و روح حدر يم بويب
الألهم السياب رمز المبدعين
شعدك أنت هنا تعبانة الوجوه
بيهة مظلومة وتناطر فرج عاجل
وبيهة ظلمت ظلم متصلحة السنين
بيهم مسمم فكر للكره داعي
وباك بسمات الطفل
وخله الأطفال بيتم و معوزين
وخلّو أمي, أمي أمي, بحزن تبجي
ويا نواعيهه مآسي, عزفت الحان الونين
كم حسين أنذبح كم زينب سبو
وبمجازرهم أتباهو مستحو
وأحنة دورنة الستر و مجتفين
مطرت الدنيا بجي مو مطر خير, يا طيور!
بلجي دمعات المطر تغسل ذنوب الحاقديين
خربو كلشي أبلادي
من بشر من ليل هادي,دنسو حتى المقدس
أنتهكو أعراض الخلك و المؤمنيين
صاحت الغـــــــــوث الأوادم
بس دكافي
هذا فعل الخسة فعل الشياطيين
لا ضمير و لاقضية
الظلم عدهم بالسجية
ذوله أحفادك يزيد مخربطين
ويا برىء المنهم تورط صحيح!
أطبع وصاير مثلهم
هذا حظ الماشي ويه المجرميين
وأنت و الحنه وغصن زيتون بيهه
ورايه بيضه وشمعه والياس و حلاوه
تعني لمة محبيين
أرحل أرحل لا تعاود بعد جيه
ذوله ما بيهم خطيه
روح دور ناس معشر طيبيين
الطير جاوبنه بعقل حكمة وفريظه
الحالة تتناسب عكس,
وأبد ما ينصف عدل بالخيريين
برد,نهران وبحر خضر المرابع
عدنة نسمات الربيع
بكل عذوبة تغزّل بحبهه الشعر و المطربيين
وآنا مثلك,ضيعت طعم الأمان
أريد أنعم بالسلامه,مثل ربعي الآمنيين
وأنت يمك بالمؤكد ,وحشه غبره و ريح صفررة
لاكن أشعر بالأمان الراح ويه الراحليين
عراقي وتايه بتكساس
