اشعار تبجيك على بغداد الحبيبة

أريد أرجع أنا لبغداد والنار اللي بكلبي بشوفتها اطفيها

أريد أرجع أنا لبغداد واشم ترابها وجفوفي احنيها

تعبنا هوايه البعاد ونار الغرب لارواحنا تجويها
.
.
.
أريد أرجع أنا لبغداد وأظل هناك أبجي .. وكل نخله بدموعي ازكيها
ومن دجلة اغرف ماي ما غير دجلة للروح يرويها
اريد ارجع انا لبغداد اشوف اهلي .. اصحابي .. اخواني .. واسهر لياليها
واكضي البقة من عمري هناك .. واموت هناك واندفن بيها
اريد ارجع انا لبغداد اشوف امي الحبيبة .. وابوس ايديها
وانام بحضنها نومة الاطفال يا محلى الدللول لمن تغنيها
.
.
.
اريد ارجع انا لبغداد .. محلتنه القديمة .. ومدرستي اللي تعلمت بيها
اريد ارجع انا لبغداد وكل همومي على دجلة اشكيها
كلنه نشكي همومنا عليه ما يوم شفناه لهمومه يشكيها
اريد ارجع انا لبغداد واصلي ركعة بالنعمان .. والثانية بالكاظم اصليها
ولو وكفه على الجسر ولو مشية بشوارعها امشيها
.
.
.
اريد ارجع انا لبغداد وافك قيودها .. وتضل حرة اخليها
لا تصدك ابن غير بلاد اله غيرة على بغداد ويحميها
اريد ارجع انا لبغداد واموت هناك واندفن بيها
اموت هناك واندفن بيها
.
.
.
.


اريد ارجع لبغداد مو خلص صبري
اريد ارجع مو حتى حيل مبقى عندي
بعدج يابغداد مدمرني
خليتي دمعتي تسيل على خدي
تعبت من فراكج
اريد اخذج بحضني وما ابعد عنج
اريد ابوس اترابج
الله
على حنيج وطيبتج
ياربي ترجعين يا بغداد لخاطر ناسك
.
.
احلى شي اببغداد لمن يصير غروب
فوق الجسر تمشي انته والمحبوب
....... ودجله تحظنك حضن وتحس العمر مافات
وشكد حلوه لمت هلك وياهم تتعشى بالكريعات
....... ولو تجي وتفتر بعد وتدخل على المنصور
...........طيبة وحنان وعشق واحلى طيور
....... والعيد عدنه حلو الله ياعيدي
.يلله....خلي نقارن سوه !! وايدك تضل بيدي
ايفل وبرجه..ومكه مول واهله
واهل لندن وكل تكساس
. يرحون فدوه ونذر لشارع ابو نؤاس
بغداد...... هليلة تمنيتج تمريلي
بغداد يا جرح القلب وينج درجعليلي
حنيت لترابــج انا و الفركة تجويني
والشوك ذكرني بوكت جنتــــي تحضنيني
تذكرين يا شدة ورد بلونــج سحرتيني
ليش ذبلان الورد وزعلانة يا عيني
بغداد يا شمعة انطفت بالظلمة عفتيني
وظليت تايه انا .. ياهو اليدليني ؟؟
عطره يفوح من القداح
... يگولون العراق الم وعذاب وجراح
.. اگوللهم الفرح موجود وبيدنا المفتاح
... يگولون شلون والعبوات والمفخخات
وكل واحد شايل سلاح
... اگوللهم إذا صرنا گلب على گلب وأيد وحدة
نبني بلدنا وننشد موطني بعالي الصوت وصياح
... ونگول للعالم إلي تراهنوا على نهايتنا
.. المستقبل النا وكل همنا نزاح..
ان شاء الله ياربي تتحقق امنية جميع العراقين

اريد ارجع انا لبغداد .. محلتنه القديمة .. ومدرستي اللي تعلمت بيها
اريد ارجع انا لبغداد وكل همومي على دجلة اشكيها


صح لسانك يامغترب

وصف جميل لعروس العواصم

رسمت لنا صور من الطفولة والشباب

أثرت فينا الذكريات

وذهبنا معك هناك -- الى الحلوة بغداد


احسنت عزيزي

عاشت ايدك اخي العزيز مشاركة رائعة ومميزة

تقبل تحياتي وتقديري

ننتظر منك المزيد

شكري الجزيل لمروركم الراقي والعراقي الاصيل