ابوذية للشاعر نائل المظفر

لانك بألتزامك مو من اهلك
اخاف اتشيل ذنبي مو من اهلك
منو بكدي يحبك مو من اهلك

منو بكدي يحبك من عشرتك
وتمنى يصير اصبع من عشرتك
وانه شكضيت خايب من عشرتك

اعد بسنين عشرتنه وهي جروح
واحس وي النفس يطلع وهج روح
واخيرا كتلي ودعني وهج روح

اروحن وين؟مااكدر هوى انته
وانه الماهان من اجلك هونته
الي بدنياي شي واحد هو انته

وحرت بين ان تركته وان تبعته
انه الونيت والون ون تبعته
ماباعك حبيبك وانته بعته

حبيبك باع عمره واشترك بيه
وحزن كلبه اعله حزنك واشترك بيه
وبعد شدوس كلبي وش ترك بيه

جبل حبه وتكلكل من تكل بيه
ويادنيا شما دفعتيه لن تكلبيه
واذا تنساه ياكلبي لاانت كلبي

ولا اريدك بعد وبصدري احملك
حبيبي شلون ترضى بصد رحم لك
اذا حملك يتعبك صدري احملك

الي وناس الارض وشكد دولها
وتداوي الداء لو بالمخ دوه الها
بس العين ما يحصل دوه الها

دواها العين خلها من تقر بيه
وتصب كلما تشوفك ماانته قربي
ولك شيصير حبك من تقربيه

وتحبني انته يقين بصدري مو شك
الف شوكة سكوت بصدري موشك
انذبح كلبي وتشذه بصد رموشك

وعرف محد يدفنه وشي دفن شي
وعكب صدره المواكد شي دفن شي
كفرمن رسم غيرك شي دفن شي

واظن للجنه يدخل من يرسمك
وحبيبك يمسح اسمه من يرى اسمك
بسمك حبي جمالك من يرسمك

وانه الليل بعيونك شفته كحله
وشفت شمس الاصيل وشفتك احلى
العسل من ضكته كلك شفتك احلى

اذن لومن شفاهك بستك اشفه
اذا انته المات يعدل بس تكشفه
شتضن حبك يضعفك بس تكشفه؟

وعلي تخفي اهتمامك واكتراثك
وانه المن مات كلبي وكتراثك
نسيت الحب الاول وك تراثك

صدك ينسه تراثه هسه جيلك
وتشوف ازواج عيني هسه اجي لك
وانادي وما تكلي هسه اجيلك

صحتلك ياااااااا صارت كبريائي
واذا رائيت بالشط كبريائي
حبيبي شلون تجرح كبريائي

وتذلني كبال كل ناسك وناسي
وبقيت بصحرى هاملني وناسي
ناس تكول لاتسكت وناس اي

لان كلش مذلتي لاكت الهم
وجبل حبي المقدس لاكتلهم
كالواحيل ذلك لاكتلهم

عنايه احتاج كلبه وجاي اعانيه
وخفيت اشكثر منك جاي اعاني
تمرمرني من ازورك جايع اني

شكثر ندمان جي بيتك عتبته
وعرفني البيت من دكتي وعتبته
عتاب وياك جي احبك عتبته

كلبي شلون يمهم وك اسرته
اسير وذل شجالك وك اسرته
كبل جانت اسرتك وك اسرته
اسرتك هسه سمتني الضحيه
اتمنى تعجبكم

الله تسلمين على هذا المجهود ياملكه زنجيل جدا رائع للشاعر نائل المظفر وتقريبا يوميا اسمعه عن طريق الموبايل تحياتي لكي اختي العزيزه على النقل وكل رمضان وانتم بخير

شكرا لكي على النقل الرائع
وننتظر المزيد من المشاركات الرائعه
تقبلي مني خالص الود والتقدير
ورمضان كريم

الله ابوذيات رائعه عاشت ايدك اخت ملكه(منوره)
اشكرك على هذا الانتقاء الرائع كلك ذوق
تقبلي تحياتي

مشكورين على المرور نورتو الموضوع

شكرا حبيبتي ملوكه على هاي الكلمات الروعه
تسلمين وعاش ذوقك
رمضان كريم