قصيدة مشتركة عن العرس بين الاخوين الشاعرين حسن تويج وكريم تويج
كريم : أسمع أشگال الرسول بحكمته
بيهه يقصد تقتدي كل أمته
بارك برخص المهور
واللي يسعي بهالأمور
بيهه يقصد تقتدي كل أمته
أنته يالمسلم تكون أنته الأصل
والنبي المختار صار أعظم مثل
بس فقير المال ولدينه قبل
والمثل حامي الحمه
وبزواجه لفاطمه
ما طلب مال بزواجه لبضعته
أنته مسلم للنبي وتكول أحب
هذا دين الله رسملك هالدرب
لا تصير أنته حجر عثره وصعب
واقتدي بقول الرسول
أنته يالمسلم تگول
والمحب يصير طه قدوته
هاي أحكام النبي وهاي الصفات
لا تخلّي المال مقياس الحياة
تطلب وتطلب بعد حد الممات
لا تثكّل بالمهر
من النبي أخذ العبر
هيچ وصّاك النبي في سنّته
أنته والدهه الرأي عندك سديد
لا تغرّك أمهه وتطالب مزيد
هاي بنتك يا لأبو وأنته شتريد
تعيش مرتاحة نفس
أنته من يمّك تحس
بالفرح مرتاح بَرّه ذمّته
حسن : لو أجاك اليوم ما عنده رزق
بالشرف مليان وبحچي الصدق
عامله باللين والحب والرفق
والرزق بابه وسيع
حريمه من أيدك يضيع
بهالوكت صعب الشريف بلگوته
كريم : والنبي وصّاك تقبل بالأجه
كون مسلم مؤمن أقبل زوّجه
مو فقير تشوفه أنته تهججه
هذا لو أبنك رضيت
چان أنته شگد حچيت
چان ثرّمته وصل في لحظته
حسن : زوّج ابنيتك لجل دين العريس
بهالزمن دين الرجل درٌ نفيس
چم غني بالمال لاچنّه تعيس
چم فگر هاني سعيد
والحزن عنّه بعيد
قانع بحال وسعيد بلمّته
ما تريده بالتمني لا محال
خطوه خطوه تصير صدّكني الرجال
بالتعب كلشي حلو مو إتكال
والتعب حصّل ثمار
واللعب ليل ونهار
خاسر وبس الحزن في رفگته
يا عريس الليله من عندك نريد
لا تعاملهه معاملة العبيد
لا تخليهه تقيّدك بالحديد
والوسط خير الحلول
والفرح عدكم يطول
والحبايب بالفرح من حنّته
