حاجيني بنظرتك وفتهم شتريد
وخلي رموش عينك هية تسألني
بس حرك رمش وآنه اعرف المقصود
وسولف بالتريده عنك وعني
صوتك.. صوتك من تسولف حقي اذوبن بيه
ماجنك تسولف جنك اتغني... نظراتك طلاسم مالهن عراف
ساعة ارتخي بيهن وساعة يجتلني
ياابيض ثلج والثوب اسود للون
كلي شلون رهمن هذا ويه اذني
ومن تمشي بدلع اسحك بكلبي تريد
وكل قصدك تدوس الكلب وتذلني
احس روحي وياروحك صارن بفد روح
واذا اسال عليك اسال قصد عني
كاتلني هواك واسال اترجاك
وغريبه شلون احبك وانت كاتلني
