لتساوي اليضحي المبدئه الروح
وي واحد جبان ومبدئه ارچيچ
وشجاب الگعد من نومه الغروب
على واحد گعد وي صيحت الديچ ؟؟
عجيبه ابهل وطن شو كلشي مگلوب
ابمكان الوردة حطينه احنه شوكه
وطلعنه الكتل والسلب الناس
وخلينه البريء ابسجن بوكه ؟؟
فرق بين اليشيل ابچفه زيتون
وبين الي ابچفوفه اسلاح شايل
دم ميرد هذا ايسيل ع الگاع
وهذاك ايگول لع لازم نقاتل
يابه احنه بلا بل موش غربان
شيطانك دنعله وصير عاقل
چذب مسلم يحب الكافر ابيوم
وچذب بغراب تقبل هل بلا بل؟؟
احسبهه عدل خل بالك وياي
ابتفاهم نحچي أحنه ابلايه صايح
أذا أني طحت يعني انته مكتول
واذا انته طحت يعني اني طايح
وحگ جرح الوطن مابين اليفوز
من نوگع المحتل هو رابح
صح انته زرع بس انه الك ماي
لأن انته اخوي وهذا واضح؟؟
متحس بالعزيز وهو وياك
بس اتحسه لمن يبعد اهواي
وميبچي الگصب من يطلع ابگاع
بس ايبچي لمن ينگلب ناي
وميحس بالنهر زرع البساتين
أله ايشح عليه ويخلص الماي؟؟
دحط ايدك بدي ونصفي الگلوب
ونطلع امن البلابل هذا الغراب
مو أنته الغراب ولاني معلوم
واضح ذاك هو اغراب الاجناب
الشاعر
احسان القريشي
منقول
