ابوذيات بعطر عنبر الشاميه

مسنه هواك لكن مستوانه
وفرق عن مستواكم مستوانه
دخيلك فوت حالي مستوانه
من اقل جدحه انفجر وتحير بيه

حجيت وكلت مسني شمسكاني
وشلزم بعد منك شمسكاني
[صرت ياما بنهارك شمسكاني
واذا تزعل كسوف يصير بيه

سيبة حيه الك كلبي ولكساب
وغيرك ما جنص باحد ولكساب
انه المايوم متجراْ ولكساب
تسب والواشي يتفرج عليه

ملكت الروح كل روحي ترالك
وبجفاك الوكت لكني ترا لك
تدور ما بعد عيني ترالك
اثر يالضاعت اخبارك عليه

ابد للمايتاعي ما تعينه
واذا للممحي تقره ما تعينه؟
اعذرك لمن كلبي ما تعينه
لان انته الشمس وانه الوطيه

انه ادريبك لعيني ما تبيهه
لجن جم حلم منك ماتبيهه
اجت هيه بدليلي ماتبيهه
محبتك كوه وانفرضت عليه

انته الهدم حيلي وانتركني
شلون اثبت بدونك وانتركني
غيرك ان نساني وانتركني
حرام انجان اهم كون انته اليه

تعيل وكلبي مايرضه يعلبيك
بعتني وخل يضل بختي يعلبيك
هم تدري الطبع هذا يعلبيك
غرور ووصلك يم الثريه

اضل دوم اطلك بهمك ولا وضاع
وولو عندك وفه ماضل ولوضاع
اذا تنشد على احوالي ولوضاع
ارد اموت وشوفتك شحت عليه

اغلط مره واتعنه لينته
يمن بجفاك للمرمر لينته
انشدك عمي للوادم ؟ لينته
اشو عندك صفو كلهم شويه

سل عودي وذبل بهواك وردي
بجفاك وصار من الضيم وردي
اذا صار الوكت وياك وردي
اعذرك من تصد وتخون بيه

اريد كتاب من جفك وذنبي
لان كلبي العشك كبر وذنبي
تعذبني بسكم هجرك وذنبي
لان حبك سباني وعم عليه

لشخصك ياهو الاكثر من داره
وياهو القره براسك من داره
اريدن كلبي اشلعه من دراه
لان حبك غلط واني الضحيه

لفن جلمات من عندك يزعلن
لياحد تكتم بحبك يزعلن
الكلب ما بعد يتحمل يزعلن
وجودك والعدم صارن سويه

الوج وبالكلب تطحن رحالاي
على الوياه ما صحت رحالاي
هذاك النوخت يمه رحالاي
وبعت عمري وشريته وخان بيه

سعاده وطيب يحبابي مساكم
وادعي من الله بالفرحه مساكم
امسه بدم اذا واحد مساكم
واسويهه معاره بكل ثنيه

بحظورك روحي وبهجرك تبرك
شكثر تتهمك وترجع تبرك
لون بشفايفك حلكي تبرك
بعد ما مر شلع بالصيدليه

جنت بس بيكم اشعر واحسنلكم
وكمت للروح اسيئن واحسنلكم
الفراك احسن النه واحسنلكم
وكلمن يذكر من بعيد اخيه

شريت الخير منك ماشرتني
شجاك تبيع ودي ماشرتني
جم مره استشيرك ماشرتني
تريد من انجبح تضحك عليه

يالكايل رحل واني مراحل
اضنك عشرتك صارت مراحل
لضلن مره اشد وصلك مراحل
لمن تصحه وترد ندمان اليه

شفت مره اندعينه واندعينه
وشفت مره اندينه واندعينه
وشفت مره اندعينه واندعينه
وشفت مره اندعينه وداع اليه

غير الضيم ماطب ليمنكم
وبعد وصيته كلبي ليمنكم
حجر جلمات عتبي ليمنكم
اسولف والسكوت يرد عليه

ماعرف العليه مجني ولجنه
بهواك وحرنه يمعود ولجنه
فرق تحقيق شكلنه ولجنه
تميز اني لو انته الضحيه

جنت فوك النوايب رايحاني
رغم مامره وكتي رايحاني
على الماكال عنك رايحاني
وتركني بلا وداع وخان بيه

عديت وما شفت كلشي منعداي
بسبب ما ميزت ربعي من عداي
عرفنه الداي بالحكمه منع داي
وانه المرهم يجيب الداي اليه

كلبي شكثر داراكم عسلكم
ومثل ما النه نتمنه عسى الكم
عسل اربيل ما يشبه عسلكم
شفاء وموت حاملهن سويه

انشدك غيرك عليه من العام
وادري بعشرتك تاهت من العام
ولك معقوله تحسبني من العام
وانه ال بس انته احسبك خاص اليه

الوكت يشدهني مره مرشدهه
ومره الجم جروحي مرشدهه
واخاف الروح تطلع من رشدهه
ويصير الجنت اخاف يصير بيه

بعد ما فيدك اني مصلحالك
رجعت بسبب وكتك مص لحالك
كبل من عندي جانت مصلحالك
تخر ساجد جنت مابين اديه

لحبك راح ننسه وانسه حبنه
وقررنا انتراجع وانسحبنه
عكب ما جان عندك ونسه حبنه
هسه اصبح مرض وعليك اذيه

يحن كلبي على حبك من احبك
واخذ زهوة شبابي مني حبك
انشدك ياهو الاكثر مني حبك
حته بهالسوله تخون بيه

نسكت كلنا من تحجي نصبلك
ودم مو دمع تستاهل نصبلك
كبل سنتين دلالي نصبلك
صنم وعليه يطوف بكل مسيه

جل هموم الك بالروح جليت
وبعد مابيه حيل جفاك جليت
طير انه وعليك بليل جليت
الصكر وازاني وانته تهوش بيه

انته الكلشي بينه وانته حبنا
وبفراكك بجينه وانتحبنا
اذا تكرهنا نهلك وان تحبنا
اشوف الدنيه تضحك بين اديه

رائع ياغفران ابوذيات في غايه الروعه

ابيات من الابوذيه جميله جدا والله يوفقك على ما تبدع وتمتعنا به من مشاركات 00فالف شكر على هذا المجهود الغير طبيعي00
تقبل مروري
اخوك الصكر

شكراااا على مرورك اخوي الصكر
:66 (46)::66 (6)::66 (46):

عاشت ايدك الابوذيات روعة

جميل جداااا


وننتظر جديدك

تقبل مروري