ابوذيات الشاعر اسماعيل الراوي

يمرني ابغفوتي شخصك وحَي له
وجيبه ابكل وسيله آنه وحيلـــــــه
وحكـ من ارسل الهادي اوّحي له
أحبك لو يصير جنون بيــــــــــــــــه

هلا بنورك حبيبي من تلاله
سطع بالكَلب من سفحه وتلاله
كَمر لا موكَمر هم منته لاله
لأن منّك اخذ هالكَمر ضيّــه

زماني هيّج جروحي وسمها
وجوى لي الروح بهمومه وسمها
زغيره الدنيا بعيوني واسمها
تكرهه الروح لن مثل الدنيّه

سبتني الروح من الدنيا ملّت
لأن ضدي مشت دايم وملّت
دهت لي النَّفس بالحسره وملّت
وانا المابي على الوادم أذيّه

يدمعي جرّحت خدّي يجاري
اشوكت يبقى الكَلب للهم يجاري
بونيني ازعجتك اعذرني يجاري
اريد اهجع ومايطلع بديّــــــــه

لجيكم وانطح الظلمه والعصار
لأن بالروح من حبكم ولع صار
اذا ماشوفك بصبح وبلعصار
اصير اني والمسودن سويّه

حبيبي اشلون حُسن وبيه وسامه
وسم كَلبي وشراييني بوسامه
ربح بيت الشعر مالي اوّسامه
شرد لو أهله بخلو بيه عليــــــــه

وسام الفوز ضاع رباع وانصاف
لأن ضاع العدل بالناس ونصاف
دهتني اللوعه مومن بسمه وانصاف
من الحق التضيعه العنصريه

أظن موعيب من بحقوقه داعه
لأن طبعه الوفى اوطيب اوّداعه
اكَول اليوم موآسف : وداعاً
لأن النفس دوم اتظل أبيه

يهش الكَلب من شخصك يمرنا
ونظل طيبين والطيّب يامرنــــا
ولكناّ على الظالم يمرنــــــــــا
ندوسه ولا نهاب من المنيـــــّه

قليل اللي دليله ايظل بلا داي
يكود اللي فطير وبي بَلاداي
جثير آلام بي من هم بلاداي
يشبّن من تهيج النار بيـــــــّه

بلادي الروح والراحه فداهه
عليها آهات تسعر موفد آهه
أكاد اسجد بلهفه الرافداهه
أبوي وأمّي هنَّ وعز اليـــــّه

سمت روحي بهواك وفوَك علّت
رغم مابيها من جفاك علاّت
أبد مايوم عالطيبين عالت
تظل سمحه الجميع الناس هيه

نظل نوفي ابعهدنا ومنتراجع
ونا ادري بك يغالي منت راجع
دروس كثار مرّت مِن تِراجـــــع
ولا نذكر بأن مرتنه هيـــــــــّه

حلو طباعك بحبك ولّعنّي
وترى عيونك يناهي ولّعنّي
أنا المايوم همي ولّه عنّي
تزيدلّي المواجع والأذيّه

دليلي جال بالميدان وانصاب
يُون من نزف جرح البيه وَن صَب
هو العشَك انبنى بعماقه وانصب
ولو صاروخ ميفلش البنيـــــــّه

عجب محبوبي خالي اليوم صفّه
يسِل روحي اذا ماكون صفـــــــّه
عَلَي هيّأ زماني اليوم صفــــــــّه
تحالف وي عدوي اشلون بيــــــّه

انتظر ردودكم

تسلم ياغفران على هاي الابوذيات الجميله للشاعر الراوي

شكراااا اخي الزير على مرورك الجميل

:66 (46):

جزيل شكري وامتناني أخي الغالي غفران على نقلك لأبوذياتي ,,

أسعدني وزادني شرفاً جهدك هذا ,, سلّمك الله وأدام قلمك المتألق ,,

تقبل خالص مودّتي

أخوك
إسماعيل الراوي