لا تلتم ضوه بعيني وتغش الشوف
مغشوش الذهب ومزيفه اللمعه
اشما تجلي بضواك الزيبكَـ يطش بيك
عليمن جا تهم والصاير تلمعه
تلتم ماي بارد وانا هودج نار
لا ترشكني واطفه ولا الك رجعه
عرفتك من عفتني اتماطل اويه سيوف
امطر دم عليك وشوجك اتزرعه
كل كطره بمصيبه وكل جرح جناز
مثل العشره اخوته وماتو ابجمعه
لا دكيت بابي ولا كلتلي شبيك
وما ظلت بواجي وهاي بس دمعه
ظمتهه الحنينه وفرهتهه العين
ونذرت من تمر تتهدل امفرعه
من غص البحر واختلكَـ بيك وكَام
شرّع جلده كَلبي ويغرف بضلعه
من اخر جرف اسمع صليل الموت
وكل روجه اعله مرهف واطلب الفزعه
يبرج ظل سماك وتجدح بسيفين
كل لويه احتجاج اتلمّك اللمعه
طبكت فوك جفني الوحشه صافن بيك
ياوجه الكباحه الترست الوسعه
خاويت الظلام ورافكيت الليل
يا ليل الغريب الما الك رجعه
اركض واسرع شما بيك من كل حيل
حته اتخف عليك الكاع بالسرعه
والحك يا سهم اخر كَـلب جدام
من صك السيوف مكبع ابدرعه
طبع الريح تصفن من يهيد الروج
واصرخ حيل بيك واعتلكَـ شمعه
واتحاوط عليك شما بنيت اسوار
بس انفخ تطيح وتوكــَـع القلعه
اكشف للغدر وجهك تستر بيك
ويطيح النكَـــــــاب ولابد تنزعه
لميتك جمر بين الجفن والعين
كل صفنه بجحيم وكل دمع لسعه
تعال وارد اشوفك جم جرح مفتوح
وجم سهم الغفه وما يقبل الطلعه
البرعم من يشكَـ جلد الشجرويفوت
ويصيح من الخواصر هيبته اتطلعه
خل ابني اعله جرحي وخله سهمك بيه
يغفه ومن يفز يتهود برضعه
ماهميت سهمك من لحكني وفات
هين من يطب والاصعب اتشلعه
الا بحاله وحده وهاي بس لحسين
اركع فوكَه وانت من الكَفه اتطلعه
اخنك يا جرح كل الجروح اتصيح
اهود يا الم وجروحي مخترعه
طبع الماي يكشخ من يجي العطشان
والكاع الاصيله اتبزه وتزوعه
عار اعله الزرع ينكر مصب اللوح
وعار اعله النهر ينكر فضل نبعه
منقوله القصيده وخل واليكول ايكول!!!
بس النه الشعر يركع الف ركعه
وتحياتي
